Ñahendu Hesu. Domingo V de Cuaresma

Escucha el evangelio y la reflexión en: https://youtu.be/bV9FdHB4uVQ

Domingo 5º Cuaresma Ciclo B Juan 12, 20 – 33

Oguãhẽ upérõ Jerusalénpe, Páskua areterã, heta oúva Gréciagui. Umíva oñemboja Felipe rendápe. Felipe niko Betsaida pueblogua opytáva Galiléape. He’i chupe hikuái:— Karai, roikuaase niko Jesúspe, ha roñe’ẽse hendive.

Felipe oho omombe’u Andréspe, ha oñondive oho hikuái Jesús rendápe. Jesús he’i chupekuéra:— Oguãhẽma niko óra opavave oikuaávo che Ñandejára ra’yha.

Peikuaa niko peẽ peteĩ semílla ndo’ái ramo yvýpe ha nomanói ramo, ha’eño reínte opyta. Ágã ho’ávo yvýpe ha omano ramo katu, upéi heñóine ha heta hi’áne. Upe hekovére hakate’ỹva, omanóta.

Upe hekovére nahakate’ỹiva katu, oikovéta opa ára guarã. Oime ramo oikoséva che rembijokuái, tou ta che moirũ. Péicharõ, che aimeháme ha’e ave oĩta. Oĩ ramo oikóva che rembiguáirõ, upévape che ru ombotuicháta.

— Ko’ágã tuicha ajepy’apy hína, ha ndaikuaái mba’épa ha’éta. Ikatu mba’éta piko ha’e: “Che ru, embohasána chehegui ko mba’e che py’a jopýva hína”. Nahániri. Upevarã voínte niko aju akue.

Che ru, ehechauka opavavépe nde réra tuicha mba’eha. Upe jave, oñehendu peteĩ yvágagui oñe’ẽva ha he’íva: “Ahechaukáma tuicha mba’eha, ha ahechauka jey voíne.”

Umi upépe oĩva, oĩ he’íva ára sunúnte ohendu hague. Oĩ katu he’íva:— Ñandejára ángel oñe’ẽ chupe.

Jesús katu he’i chupekuéra: — Pe oñe’ẽ va’ekue niko oñe’ẽ pene pytyvõ haguã peẽme, ndaha’éi chéve. Oguãhẽma hína ára Ñandejára omboguapývo henondépe opa yvypórape. Ha Aña katu, ko yvy ruvicha, oñemosẽta águi. Ágã kurusúre che mosãingóvo hikuái, ha upéi yvágape ajehupívo, ambyatýne che jerére opavavépe. Péicha Jesús omombe’u chupe kuéra mba’éichapa omanóta.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ñanerakate’ỹ niko ñande jehe ha ñañangareko ñande rekovemíre. Ajépa. Nahi’ãi niko ñande
rasy, ojehu ñandéve mba’eve ivaíva ha ho’a ñande rehe pytũ.

Hesu avei niko hakate’ỹ va’ekue hekovére ha nomanoséi. Oforsa ichupe oñandúvo outaha hi’ári jehasa asy, kurusu ha mano. Ha ojerure asy Ñandejárape ani haguã osufri eterei. Ñande avei jajerure háicha. Ajépa chirũ.

Ohecha katu Hesu ijehénte oma’ẽramo ndaideprovécho mo’ãi hapicha kuérape. Ha ome’ẽ va’erãha hekove pe semílla oñeñotỹva icha ha omanóvo yvyguýpe heñói haguã, oikove jey
haguã. Hi’a porã ha hi’a heta haguã.

ÑAÑEMBO’E OÑONDIVE

Ñandejára Hesukrísto rehasa asy ha emano va’ekue ore rayhupápe, aníkena eheja ore rakate’ỹ eterei ore jehe ha romboty ore korasõ ore rapicha oikotevẽ ha ohasa asýva renondépe. Amén.

Pa’i Alberto Luna.