Ñahendu Hesu Ñe’ẽ. Domingo 25º Durante el Año

Escucha el evangelio y la reflexión en: https://youtu.be/gvoW7qPIZuI

Domingo 25 Durante el Año Ciclo C Lucas 16, 10 – 13.

Upérõ Jesús he’i idisípulokuérape: Upe michĩ ra’ymíre oñangareko kuaávape niko, hetave mba’e ikatu jaheja ipópe. Ha upe michĩ ra’ymíme ipokarẽvape, ko’yteve ipokarẽta heta mba’e oñemoĩ ramo ipópe. Ha pende pópe ndaikatúi ramo jaheja pláta ra’ymi, pokarẽme oñembyatýva, piko máva ohejáta pende pópe umi mba’e ovaléva. Ha pende rapicha mba’e ndapereko kuaáirõ piko, máva ome’ẽta peẽme pene mba’e teéva.

Patron niko ndajareko kuaái mokõi. Peteĩre na ñande’a’éi chéne ha jahayhuve pe ambuépe. Ha peteĩrente ñapenárõ, ñamboyke pe ambuépe. Ha upéicha avei, ndaikatúi ñambojerovia Ñandejárape ha pláta oñondive.

Ñandejára Jesucristo ñe’ẽ.

ÑAMBOGUEJY KO ÑANDEJÁRA ÑE’Ẽ ÑANDE REKOVÉPE

“Plata ha kuarahýre ndaikatúi ñama’ẽ are”. He’i ningo lo mitã. Ha mba’érenepa péicha oje’e. Ha oiméneko pe kuarahýre ñama’ẽ aréramo ikatu háicha japyta ñaneresatũ, upéicha avei pe plata itáre ñama’ẽ aréramo ikatu ñande py’aho hese ha upépe ikatu japyta ñaneresatũ etéma voi, pe plátantema ñandéve guarã ha ndajahechavéima ñande rapicha remikotevẽ. Ha ikatu voi jajapo opa jajapo’ỹ va’erãva pe plata atýra jarekoségui.

Upévare ko oiméne Jesús he’i ndaikatúiha jareko mokõi la ñane patrón. Peteĩrente ñapenáta, he’i, ha ñañembotavýta upe ambuégui. Ndaikatúi jahayhu ha ñambojeroviávo oñondive Ñandejárape ha upe jave jahayhu ha ñambojerovia upe plátape. Ha mba’e piko jajapóta. Ikatu ja’e. Pe plata’ỹre niko ndaikatúi jaiko. Ñañeha’ã niko hese jahupyty haguã ñaikotevẽmíva, ha hese’ỹ ijetu’u ñamýi haguã jepe.

Jesús niko nde’íri ani haguã jaiporu upe plata jarekóva, ñaganáva hekópe ha oñeme’ẽva ñandéve. Ha’e voi niko oiporu va’ekue avei upe plata itiémpope heta mba’e porã ojapo haguã. Upe Jesús ñanembo’éva hína ani jaheja upe plata pota ñanesãmbyhy ha omanda ñande rehe. Ani ñane chi’õ ha ñande po mokéte, ani ñambyasy upe ñame’ẽva.

Amo hapópe niko, nde chirũ ha che reindy, ñande kapatáichante ñaime hína. Ñane patrón mba’épante niko hína opa mba’e jarekóva. Ha’e oheja ñande pópe plata, óga, tembiporu, arandu ha katupyry, ñambovevúi haguã hekove ñande rapichápe. Anínte ágã ouvove ñane patrón guasu ohecha mba’éichaitépa jaiporu umi ha’e oheja va’ekue ñandéve, japyta okápe po nandi ha umi ñambyaty va’ekue orahapa ñande hegui yvytu.

ÑAÑEMBO’E OÑONDIVE

Ñandejára Jesucristo, roipota nde epyta ore patrón guasu ramo, roiporukuaa haguã plata ha opa mba’e rorekóva rojapo haguã nerembipota. Amén.

Pa’i Jasy.