Ñahendu Hesu Ñe’ẽ. Domingo VI de Pascua

Escucha el evangelio y la reflexión en: https://youtu.be/yLUcDJQMoig

DOMINGO VI DE PASCUA.

Ciclo A Juan 14, 15 – 21.

Upérõ Jesús he’i idisípulokuérape: – Peẽ che rayhu ramo, pejapóta umi mba’e che ha’éva peẽme. Ha che ajeruréta che rúpe ombou hag̃ua peẽme peteĩ pene pytyvõ vaerãva, oĩ hag̃ua pene ndive opa árape.

Upéva hína Espíritu Santo, ha ha’e oikuaaukáta peẽme añeteguáva. Umi Ñandejárare ojerovia’ỹvape katu, ndou mo’ãi pe Espíritu Santo. Umíva niko ndohechái ha ndoikuaái chupe. Peẽ katu niko peikuaa chupe, ha’e oĩgui pene ndive ha oikótagui pende pype.

Ndapoheja mo’ãi tyre’ỹ. Aju jeýta aime hag̃ua pene ndive. Ko’ẽrõite, umi Ñandejárare ojerovia’ỹva nda che recha mo’ã véima. Peẽ katu che recháta ha peikovéta, che aikove jeýtagui.

Upéva upe árape, peẽ pehecha kuaáta che peteĩnteha che ru ndive, ha peẽ peteĩnteha che ndive, ha che peteĩnteha pene ndive.

Upe ohendu ha ojapóva che ñe’ẽ, ohechauka che rayhu añeteha. Che ru ohayhúta chéve che rayhúvape, ha che avei ahayhúta
chupe, ha ajechaukáta chupe.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Tuichate mba’e niko ohóramo mombyry ñande hegui peteĩ jahayhúva ha japytáramo ñane ño ha ñane tyre’ỹ ichugui. Ñambyasy niko osóramo pe jajapóva oñondive, ikatúramo jepe uperire jajotopa jey. Ha tuichave mba’e katu niko oiméramo jahayhúva ojehekýiva
ñande hegui, ha ndaikatuvéimava ñamosã jevy jahasa vaekue oñondive.

Hesu he’i iñirũ nguérape ohotaha itúva rendápe, upe ou haguégui, ha upégui omboutaha peteĩ pu’aka omoirũ vaerãva ichupe kuéra, ani haguã ityre’ỹ ichugui, ani haguã oso pe tape omoñepyrũ vaekue hendive kuéra, ani oparei umi mba’e ha’e ombo’e va’ekue.

Ha pe Hesu omboúva omosã haguã hembiapo ko múndope niko hína pe Espíritu Santo.

Ñandejára Espíritu omoañetéva ñande rekovépe Hesu ñanembo’e vaekue, ñande avei ñañandu haguã upe Hesu oñandu vaekue ha jajapo haguã ha’e ojapo haguéicha. Hesu ñanemoirũ, nañanderejái ñane ño rei, omoirũ aty Iglésia guáva hese ojeroviávape, ha
ñanemoirũ avei peteĩ teĩme, ñane ño ñaiméramo jepe, ñane sarambíramo jepe ojuehegui. Pe Hesu Espíritu ombogue ñande py’águi kyhyje ha vy’a’ỹ.

Jahasa asýramo jepe, che reindy ha nde che irũ, pe Espíritu ome’ẽ jerovia, ñanembopy’aguasu ha omongakuaa mborayhu ha ñepytyvõ oñondive. Oipe’a tape ñanerenonderã, ñanemopu’ã jareko haguã esperánsa, ñama’ẽ haguã mombyryve ha ani haguã ñande py’a mano ñaimo’ãgui okañýmaha ñande hegui vy’a rape.

ÑAÑEMBO’E OÑONDIVE

Ñandejára Hesukrísto, nde orerayhúgui oremoirũ ha ndaorerejáiva, aníkena eheja pe kangy ha kane’õ ipu’aka ore rehe. Eñanduka oréve reimeha añete ore ykére, ore mbareteve haguã jerovia ha mborayhúpe roguatávo oñondive. Amén.

Pa’i Alberto Luna.