Ñahendu Hesu Ñe’ẽ. Juan Bautista ojejukaha ára

Escucha el evangelio y la reflexión en: https://youtu.be/zmAwYoyqDqk

29 agosto. Juan Bautista ojejukaha ára. Marcos 6, 17 – 29

Herodes niko omenda vaekue Herodías rehe, tyvýra Filipo rembirekore ndive. Ha Juan he’i va’ekue chupe, “Ndaikatúi remenda nde ryvy rembirekorére. Péicha ndajajapóiva.” Upévare Herodes o’apresauka va’ekue Juánpe. Herodías niko nda’ija’éiva voínte vaekue Juan rehe.

Ojukase ramo jepe chupe, ndaikatúi, Herodes ndohejáigui chupe. Herodes niko okyhyje vaekue Juángui, oikuaágui kuimba’e marangatuha ha’e. Ha ohendu ramo jepe umi mba’e Juan he’íva, opyta jepi oikuaa’ỹre mba’épa ojapóta.

Upéicharõ jepe, py’ỹi ojapysakámi va’erã umi mba’e Juan he’ívare chupe. Hi’ára mbotýpe, Herodes ojapo peteĩ karu guasu hógape. Upépe oho poguasu ha mburuvichakuéra Galileapegua. Herodías katu ohecha kuaa pe vy’a guasu aja ijáne haguã chupe
ikuã cha’ĩ Juan rehe.

Ovy’ave jave hikuái, Herodías memby kuña oike ojeroky. Péva tuicha ombovy’a Heródespe ha umi hendive oĩvape. Ha opavave oguerohorýgui, Herodes osẽ he’i chupe: — Ejerure chéve reipotáva ha ame’ẽta ndéve.

Ha he’i jey-jey chupe ome’ẽtaha chupe ojeruréva, hetã mbytere jepe. Ha oho pe mitakuña oporandu isýpe: — Mba’éiko ikatu ajerure chupe.

He’i chupe isy: — Ejerure chupe Juan Bautista akãngue.

Pe kuñataĩ pya’e ojevy Herodes rendápe, ha he’i chupe: — Aipota eru chéve plátope Juan Bautista akãngue.

Tuicha oguapy Herodes rehe upe ohendúva. Ha nopyrũséigui iñe’ẽre ome’ẽ va’ekue opavave rovake, ojapo mante va’erã pe mitakuña ojeruréva chupe. Upévo, pya’e omondo peteĩ guárdia kárselpe, upéva oñakã’o Juánpe, ha ogueraha iñakãngue plátope Heródespe. Ha’e ome’ẽ upe mitakuñáme ha ha’e ome’ẽ isýpe.

Juan disípulo kuéra ohendúvo ojejuka hague, oho ogueraha hetekue ha oñotỹ.

Ñandejára Jesucristo ñe’ẽ

ÑAMBOGUEJY ÑANDE REKOVÉPE…

Karai guasu, patrón, mburuvicha, autoridakuéra, ojapóramo hendape’ỹva hetápe ombyai, heta renondépe oimégui ha hetápe oisãmbyhýgui. Heta oñeme’ẽgui chupekuéra heta avei oñeha’arõ ha ojejeruréta ojapo haguã.

Upévare avei hembiapo vaíramo tekotevẽve oje’e chupekuéra ojavyha ha oñembohovái. Jaikuaa jepe ñande mburuvicha imbarete ha ipu’akavégui ñande hegui ñambopochýramo mbykyete hína oity haguã ñane lómore itukumbo. Ha upévare ñakirirĩnte, ñañemolénte hũ, ha ndajahechái, ndajaikuaái ete gua’u hapykuere ky’a.

Juan Bautista, ko árape ñanemandu’aha, he’i hovaitépe hembiapo vaikue mburuvicha Herodes pe, ha ohechauka ñandéve mba’éichapa ñande, che irũ ha che reindy, ñande py’a guasu vaerã ñahenonde’a ha ñambohováivo hembiapo vaívape, taha’e jepe mburuvicha guasu. Ikatu avei ñande jahasa asy upe jave, Juan Bautista ohasa asy haguéicha, ikatu ñamoirũ Jesús pe ñamboguata imívo hendive pe ikurusu.

Pa’i Jasy.