Ñahendu Hesu Ñe’ê. Jueves 21º Durante el Año

Escucha el evangelio y la reflexión en: https://youtu.be/UePgT3TxW30

       

Jueves 21º Durante el Año Mateo 24, 42 – 51

Upérõ Jesús he’i: Pejesarekóke, cháke ndapeikuaái hína araka’etépa ajúne. Perekóke kóva pene akãme. Óga jára oikuaa ramo araka’épa mondaha oikéta hógape, ndoke mo’ãi ani haguã avave oike hógape omonda chupe. Upévare, peẽ avei pejesareko va’erã. Peimo’ã’ỹve jave niko ajúta. Mávapa hína pe tembiguái jeroviaha ha imba’e recha kuaáva.

Upéva hína pe óga jára ohejáva ipópe hóga ha hembiguáikuéra omongaru ha oñangareko haguã hesekuéra. Tuicha niko ovy’a pe tembiguái, ijára oguãhẽ vove, ojuhúrõ chupe ojapopaha hekópe hembiapo. Añete ha’e peẽme, pe óga jára omoĩne ipópe opa mba’e oguerekóva.

Ja’éntena pe tembiguái oimo’ãha ijára hi’aretaha, ha pévare oñepyrũ oñemboharái hapicháre, ha osẽ ovy’a ha omokõ hapicha ka’úndi. Ágãnte pe óga jára ou jeýne, oimo’ã’ỹ ha oha’arõ’ỹve jave, ha omboparáne teju ruguáipe, mondaha ñambyepõtiháicha. Ha upépe ojahe’o soróta ha hãi mante opururũta.

Ñandejára Hesukrísto ñe’ẽ.

ÑAMBOGUEJYMÍNA ÑANDE REKOVÉPE…

Ñande niko jaikuaa oguahẽ va’erãha ára ñamanóvo ha, ndajaipotái ramo jepe, oguahẽ avei ára pohýi ñande rekovépe. Ndajaikuáainte niko araka’etépa ñande ára guahẽta. Ndajaikuáai avei araka’épa ikatu ho’a ñande ári desgracia, jejopy vai, mba’asy, ñaikotevẽtaha umi ñambyaty va’ekuére.

Jesús he’i umíva rupi ñande patrón guasu ojerureha ñandéve cuenta jahechauka haguã mba’éichapa jaiporu umi ome’ẽva ñandéve, mba’éichapa jajerereko jaikóvo.

Oiméramo ñañangareko ñane rembiapo Ñandejára ome’ẽ va’ekue ñandéve rehe, ikatúta jaropu’aka ha ñambohasa umíva. Ha jaikóramo ñembotavy ha vyroreípe katu, pe apañuái, mondaháicha orahapáta ñande hegui jarekomíva guive ha japytáta ponandi.

Ñañeha’ã ko’ãga, he’i Jesús, ñamoĩ porã jahávo ñande kuatia tapére. Ani ñambohasa, ani ñaimo’ã ãgante ikatutaha ñamohendapa. “Amóntema”, he’íva ku ñe’ẽ.

Ko’ẽramo niko ndajaikuaái, ikatu nako’ẽvéi mba’e ñandéve guarã. Upe óga jára ijeroivaháva, he’íva Jesús, upéva niko oiméne nde hína che irũ ha che reindy.

Upéva hína pe ohenonde’áva mondaha. Oñangareko hóga ha hogaguáre, ohechakuaa ha oñeha’ã omoĩ oñeikotevẽva: tembi’u, ao, escuela, pohã. Ha ñande róga guasu niko avei ñande barrio, comunidad, capilla, ñamba’apoha, organización ha mba’e.

Hi’ãite jaha hese péicha ñañangareko ñande róga, ñande rekoha ha ñande comunidad rehe, ñamohu’ãmeve ñane rembiaporã. Ha ñane patrón ou vove, tañandejuhu porãite. Tuicha omyengoviáta ñandéve, he’i Jesús, ha upépe javy’áta hendive ñande.

Pa’i Jasy.