Ñahendu Hesu Ñe’ẽ. Jueves 23º Durante el Año

Escucha el evangelio y la reflexión en: https://youtu.be/962t5dMfrCY

Jueves 23º Durante el Año Lucas 6, 27 – 36

Upérõ Jesús he’i idisípulokuérape: Pehendúke ko ha’éva peẽme. Pehayhu umi pende rayhu’ỹvape, ha pejapo iporãva umi pende rehe ija’e’ỹvare. Pejerure Ñandejárape tohovasa umi pende rehe oñe’ẽ vaívape, ha peñembo’e umi pende ja’óvare.

Oĩ ramo nde rova petéva, eheja tanderova pete jovái. Ha oimérõ oipe’áva ndehegui nde ahoja, eheja togueraha nde ao ave. Oimérõ omba’e jeruréva ndéve, eme’ẽ chupe. Ha oimérõ oipe’áva ndehegui nemba’éva, ani ejerure chupe ome’ẽ jey haguã ndéve. Pejapo pende rapicháre upe peẽ peipotáva ojejapo pende rehe.

Peẽ pehayhúrõ umi pende rayhúvapente, piko mba’e iporãva pejapo. Umi mba’e vai apoha jepe niko péicha ojapo. Ha pejapórõ iporãva pende rapichápe pende rehe ojapo porã haguérente, piko mba’e iporãva oĩ upévape.

Umi mba’e vai apoha jepe niko péicha ojapo. Ha peiporukárõ umi omyengovia jeýtava peẽmente, pejapo nga’u piko upéicharõ tuicha mba’e. Umi mba’e vai apoha avei niko oiporuka ojupe, oha’arõgui ojeporuka jey avei chupe. Pehayhu vaerã pende rayhu’ỹvape. Pejapo iporãva ha peiporuka peha’arõ’ỹre mba’eve hekovia.

Upéicharõ, tuicha jopói Ñandejára ome’ẽta peẽme. Ha peikóta Ñandejára ra’y ramo. Ha’e niko ipy’a porã ha ohecha kuaa heko vai ha
iñañávape. Peiporiahuvereko vaerã opavavépe, pende Ru pende poriahuvereko háicha peẽme.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Pe tuguy raku ha pochýgui osẽva niko heta vése ñambyasy ja’e ha jajapo hague. Upéintema jahecha kuaa iporãve va’erã mo’ãha ñakirirĩ mba’e ha ñambohasa. Ha’ete umi ñuatĩ oike pypuku ha okambúva ñande ro’óre, hasýpe oikéva ha hasypeve osẽva.

Upe tie’ỹ, ñe’ẽ vai, ñorairõ, pochýgui oúva niko peteĩ tatáicha. Ha ñambohováiramo tie’ỹ, ñe’ẽ vai, ñorairõme jey niko ha’ete ku ñambogueséramo guáicha peteĩ tata japoíramo hi’ári kerosén mba’e. Ogue rangue ojepotavéta, ndaijokoha mo’ãvéi ha ñande rapy jovaipáta amo ipahápe.

Upévare Jesús he’i ñandéve ñambohovái haguã tembiapo vai tembiapo porãme. Ikatu haguãicha añete ñambogue upe pochy rata, ha ñamoĩ hendaguépe py’aguapy ha mborayhu. Heta rasáma niko la jeiko vai, ñorairõ, pochy ha aña ko múndope, ñande avei ñambojo’ave haguã. Iporãve va’erã ningo ñambogue ha jajokóramo.

Jahayhu ñande rayhu’ỹvape, jahovasa ñande rehe oñe’ẽ vaívape, jajapo iporãva umi ija’e’ỹvare ñande rehe ha ñañembo’e ñande ja’óvare.
Ñande katu niko, che irũ ha che reindy, ñande pavílo mbyky jakapu haguã, ha ñaikotevẽ Jesús ñanembo’e mba’éichapa ñanemba’e porã vaerã umi ñande reko asýva ndive. Anínte upéi upe ñande pochy vaikue ñande rapicha ndive ojerepaite ñande rehe ipahápe.

Pa’i Jasy.