Ñahendu Hesu Ñe’ê. Jueves III de Cuaresma

Escucha el evangelio y la reflexión en: https://youtu.be/38iGJBJyGxc

Jueves 3º Cuaresma Lucas 11, 14 – 23

Upérõ Jesús omosẽ peteĩ karia’ýgui peteĩ demóño omoñe’ẽngu vaekue chupe. Ha pe demóño osẽvo, upe iñe’ẽngúva oñepyrũ oñe’ẽ. Opavavénte opondera joa upéva. Oime jepe he’íva: “Beelzebú, ku Aña ruvicha, ha’e niko pe ome’ẽva Jesúspe pu’aka omosẽ haguã umi demóño.”

Oĩ ave ombopakova pireséva Jesúspe. Ojerure chupe hikuái ojapo haguã peteĩ milágro ohechauka haguã Ñandejára oĩha hendive. Jesús katu, oikuaáva mba’épa ombojere hikuái iñakãme, he’i chupekuéra: Peteĩ tetã oñemboja’opa ramo ha ihénte kuéra opu’ãmba ramo oñoakãre, oñehundi.

Péichante avei peteĩ ógape, opu’ãmbárõ hikuái ojuehe oñehundínte avei. Ha Sataná voi opu’ãrõ ijehe, piko noñehundi mo’ãi nga’u. Peẽ niko peje che amosẽha umi demóño Beelzebú rupi. Ha pejemi chéve máva rupi piko pende disípulokuéra omosẽ umi demóño. Ha’e kuéra ohecha kuaáta hína peẽ pejavyha. Ha che amosẽ ramo umi demóño Ñandejára po rupi, upéva he’ise Ñandejára Rréino oguãhẽmaha pende apytépe.

Peteĩ kuimba’e imbarete ha hi’árma porã ramo, hasýta ojeike hógape ha oñemonda chugui. Ikatu ou chupe peteĩ imbaretevéva ha ipu’aka hese. Oipe’a chugui hi’árma, oguerahapa oguerekóva, ha omboja’o umi hendive oĩva ndive.

Peẽ napeiméi ramo chendive, peñemoĩ hína che rehe. Napemono’õi ramo chendive, pemosarambi hína.”

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Pe mboriahu ha pe ikangyvéva niko okirirĩ guasu ha oñakãityhápente oikóva. Noñeporandúi voi chupe mba’épa oñandu, mba’e oikotevẽ ha mba’épa oipota. Ndojeikuaaséi voi chuguikuéra mba’eve guasu. Iñe’ẽngúramo guáicha ojereko.

Ágã katu ou ramo campesino, indígena, sin tierra, sin techo, omýi ha ijaty, oñeorganisa ha ohendukase iñe’ẽ ha ojerure iderecho, ndofaltái va’erã omohũ, ombyai ha he’íva hesekuéra comunista, bochinchéro. Mbyky oñemboja haguã hesekuéra sekuéstro, guerrílla umía. Aña rembiapo ramo ojehechauka ha oñemoherakuã pe ojapóva ha oñemokirirĩse.

Jahecha Jesús omoñe’ẽ peteĩ iñe’ẽngúvape ha oĩma katu he’íva hese Satana irũ haguére umíva ojapoha. Ombojoja Jesús pe Añáre, oipe’a haguére isã pe iñe’ẽngúvagui.

Jesús he’i chupekuéra péva ojapoha Ñandejára po rupive. Ha’e ou hague omondohóvo umi oñeapytĩva sã poguasu, omboguata umi paralítiko, ha omombe’u Ñandejára mborayhu oñeme’ẽha omopu’ã haguã imboriahúgui ojejopývape. Ha upe tembiapópe, he’i Jesús, nañaiméiramo hendive ñapu’ã hese hína.

Ñama’ẽ porãke che reindy ha nde che irũ, ani anga ñande rapicha ojejopýva, imboriahúva ha ikangýva ape ári jajeity, ñamuña ha ñamosarambi. Jesús apére jajeity hína upéicha ramo, ichupe ñamuña ha ijovecha kuéra ñamosarambi.

Pa’i Alberto Luna.