Ñahendu Hesu Ñe’ẽ. Martes V de Pascua

Escucha el evangelio y la reflexión en: https://youtu.be/SUCR4Tk4cpE

MARTES V DE PASCUA

San Juan 14, 27-31a

Ohasa mboyvemi Tupã ykére, Jesús he’i hemimbo’e kuérape: Py’a guapy niko aheja peẽme. Py’a guapy che arekóva ame’ẽ peẽme, ha name’ẽi oimeraẽva ome’ẽháicha. Ani pekyhyjétei térã pejepy’apy. Pehendúma niko ha’e hague peẽme ahataha, ha upéi aju jeytaha aime haguã pene ndive. Che rayhu ramo añete, pevy’a vaerã peikuaávo ahataha che ru rendápe. Ha’e niko tuichave chehegui. Amombe’u hína peẽme ko’ã mba’e, ojehu mboyve. Péicharõ, ágã ojehu vove, perovia haguã ko’ã mba’e ha’éva peẽme.

Nañe’ẽ puku mo’ã véima pene ndive, oúguima hína Aña, pe oguerekóva ipoguýpe ko yvy. Ha’e jepe niko nda’ipu’aka mo’ãi voínte che rehe. Che niko ajapo vaerã voínte upe che ru oipotáva. Péicharõ mante niko opavave oikuaáta che ahayhuha chupe, ha che ajapoha pe
ha’e he’íva chéve.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Araka’épa ikatúta japytu’u ha ñande py’aguapy. Oĩ he’íva, ágã amanóvo apytu’úne ha che py’aguapy, jaikove aja jajepy’apy ha ñañeha’ã mante, ndaipóri piro’y puku, ñande juku’a ha ñande ry’ái jahupyty haguã vy’a pehenguemi oguéva py’aete ñande hegui.

Hesu katu he’i ome’ẽtaha ñandéve py’aguapy imba’éva, upe py’aguapy ha’e orekóva, ndaha’éiva py’aguapy ko yvy arigua. Ha mba’épa oiméne upéva he’ise.

Oiméneko hína he’i upéicha pe py’aguapy Hesu ohejáva ñandéve nañandepe’áigui katuete jehasa asýgui. Ñandejára py’aguapy ndaha’éi ko yvy arigua vy’áicha, sapy’arã ñanderupytýva. Pe Ñandejára py’aguapy opyta ñande pype ha ñanemombarete ñande pu’aka haguã opaichagua mba’e pohýi oúva ñane akã ári rehe.

Hesu niko ipy’aguapy ojapógui upe Ñandejára oipotáva, upépe ha’e ojuhu vy’a ha py’aguapy, upéva hína la hapo, ha upépe ha’e hatã oñeprende, péva pe py’aguapy Ñandejára mante ikatu ome’ẽ. Ha upéva hína upe py’aguapy Hesu ome’ẽva ñandéve.

Heta mba’e niko lo mitã ojapo ovy’a ha ojediverti haguã. Umíva apytépe oime sapy’aite guáva ha uperire ñandereja vaíva. Ñemokõ ha jeka’u, dróga, fárra saingo, japoi ñande jehegui toiko la oikóvape. Umíva umi vy’a gua’u jahecha naiporãiha ñande reja vaígui, ñanembyaígui ñande rogapy, ñande rete ha ñande py’ápe. Ndoguapýi ñande rehe, ipahápe ñanembohasy ha ñanemoingo vaíma katu. Nañanembopy’aguapýi.

Ñama’ẽ vaera aipóramo che irũ ha che reindy, upe ñanembovy’áva rehe. Mba’épa ou hapykuerépe, mba’e ogueru. Oguerúpa py’aguapy ha jeiko porãve, terãpa ñanembyai ha amo ipahápe upe oñepyrũ vaekue vy’ápe opa ñembyasýpe.

Umi vy’a Ñandejára ome’ẽva ñandéve nañanembyaíri ha opyta areve ñande pype, ndoguéi péicha péichante, ojapo porã ñande rehe, ñanembo py’aguapy.

Pa’i Alberto Luna.