Ñahendu Hesu Ñe’ẽ. Martes VI de Pascua

Escucha el evangelio y la reflexión en: https://youtu.be/619a47lGCDc

MARTES VI DE PASCUA

San Juan 16, 5- 11

Jesús oñandúvo oguãhẽmaha ára ha’e ohejávo ko yvy oho haguã túva rendápe, he’i idisípulokuérape: Ko’ágã katu niko aháta hína aime haguã che ru ndive, ha peẽ napeporandúi chéve moõpa aháta. Peñemoĩ katu peñembyasy ha’e haguére peẽme ko’ã mba’e. Añetéko ha’e peẽme, iporãvéta niko peẽme che ahárõ. Ndaháirõ, Espíritu Santo pene pytyvõhára ndou mo’ãi penepytyvõ.

Che ahárõ katu, amboúta chupe peẽme. Ágã ha’e ou vove, ohechauka porãta máva-mávapa hembiapo vai, mávapa nahániri, ha mávapepa Ñandejára omoĩta hendaguãme. Ha mávaiko pe hembiapo vaíva.

Upe ndojeroviáiva che rehe. Ha mávaiko pe hembiapo vai’ỹva. Ha che, ahátava hína che ru rendápe, ha peẽ nda che recha mo’ãvéi. Ha mávapeiko Ñandejára omoĩta hendaguãme. Añáme, pe oguerekóva ipoguýpe ko yvy, ha Ñandejára he’ímava ohunditaha.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Ñande ningo ñane mitãme ndaikatúi jaiko ñande sy’ỹre, ijyva ári ha hapypa’ũme ñakambu ha jakakuaa oguahẽmeve ára ñanembopo’o haguã. Pe mitãme guarã ningo ijetu’u péva ha ndopoiséi isýgui. Opáichavo upe sy oikuaa hina tekotevẽha ombopo’o pe mitã ikatu haguãicha mokõivéva ijehegui, pe mitã ndopo’óiramo niko opytáta osaingo isýre ha pe sy ndaikatu mo’ãi mba’eve ojapo chugui, iporãve hina oñemosãmbuku ojuehegui mokõivéva.

Pe sy niko ndohejái imembýpe oñemomombyry imínte chugui, upéicha pe mitã okakuaáta ha osẽ isy sái ruguái guýgui, oñembokatupyry ohenonde’a haguã ohóvo opa mba’e ha’eño.

Upéicha avei Hesu he’i iñirũ nguérape: Iporãvéta peẽme che aha ramo. Hesu oikuaa ha’e opyta ramo umi apóstol ndokakuaa mo’ãi, ojekótante hese ha ndaijehegui mo’ãi.

Ñande avei Hesúicha jaheja vaerã ñande rapicha ha’eño, ñande rógape, ñamba’apo hápe, ñande comunidad, capilla-pe, ñame’ẽ vaerã káncha ipyahuvéva ha imitãvévape, ñamopa’ũ ikatu haguãicha hikuái oñakãrapu’ã, oguata ijehegui ñande rehe’ỹ, tojehechakuaa, tojetyvyro ha toñembokatupyry. Opa ára ñaime ramo hi’ári ha nañasẽiramo ijykéregui, ojekónte ñande rehe hikuái ha ndokakuaái, notyarõi, opyta ikangy ha ipituva.

Upévare Hesu oho, okúi, okañy, ogue, omano, hendaguépe ñapu’ã haguã ñande, jajapo ha ñamosã jahávo upe ha’e omoñepyrũ va’ekue, upe ñanembo’e ha ohechauka va’ekue.

Upéva iporãve, upéva ñanemongakuaa. Japyta ramo jepe ñane ño Hesu nañanderejaitéi, ha’e ombou ñandéve Espíritu Santo, ñane pytyvõhára, ñanemomandu’áva iñe’ẽre ha ñanemombaretéva jaguata haguã oñondive Hesu rapére.

Mba’épepa hína che reindy ha nde che irũ ikatu oime rejeko ha reha’arõ iterei hína nde rapicha térã katu Ñandejára voi ojapo ha ome’ẽmba ndéve. Noimeichénepa oguahẽma hína pe tiémpo ndéma nde jehegui epu’ã, eguata ha ejapóvo upe Ñandejára oñandukáva
ndéve nerembiaporã. Mba’épa reñandu.

Pa’i Alberto Luna.