Ñahendu Hesu Ñe’ẽ. Martes VII de Pascua

Escucha el evangelio y la reflexión en: https://youtu.be/6x7MXtAP2MI

Martes VII

Pascua Juan 17, 1-11a.

Upérõ Jesús oñe’ẽ rire idisípulokuérape, omaña yvágare ha he’i: Che Ru, oguãhẽma niko ára emomba’e guasúvo nde ra’ype, che avei romomba’e guasu haguã ndéve. Nde niko remoĩ che poguýpe opa yvypóra, ame’ẽ haguã jeikove opave’ỹva umi chéve reme’ẽ va’ekuépe. Ha upe jeikove opave’ỹva niko kóva: tandekuaa ndéve, Ñandejára añetete ha peteĩetéva. Ha avei ta che kuaa chéve, Jesucristo, nde rembou
va’ekue.

Ko yvy ári niko nde réra ambotuicha ha ahechauka ne mba’e guasuha, ha ajapopa umi mba’e reipota vaekue ajapo. Aipóramo che Ru, eme’ẽ jeýna chéve pe pu’aka areko va’ekue ku aimérõ guare nde ypýpe ko yvy ojejapo mboyve.

Umi reiporavo va’ekue reme’ẽ haguã chéve, umívape niko aikuaauka mávapa nde. Ne mba’e va’ekue niko ha’ekuéra, reme’ẽ chéve ha ojapopa hikuái ne rembipota. Ko’ágã oikuaa hikuái opa mba’e reme’ẽ vaekue chéve, ouha nde hegui. Aikuaauka chupekuéra ne ñe’ẽ, nde reme’ẽ vaekue chéve, ha iñe’ẽ rendu hikuái. Ohecha kuaa hikuái añeteha che aju hague ne rendágui ha nde che mbou hague.

Ajerure niko ndéve umi ne mba’évare, umi nde reme’ẽ va’ekue chéve. Nañembo’éiri umi nde rehe ojerovia’ỹvare. Opa umi che mba’éva niko ne mba’e, ha opa ne mba’éva niko che mba’e ave. Ha ha’ekuéra rupi ojehecha che tuichaha. Che niko ahátama aime haguã ne ndive ha naime mo’ã véima ko yvy ári.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Mba’épa nde repensa pe tuichave mba’e ikatúva eme’ẽ ehayhúvape. Ao porã, tembi’u he, pira pire, estúdio, hógarã… Mba’épa eheja vaerã nde rapykuerépe nde famíliape, ne irũnguérape.

Hesu oheja potávo ko yvy oho jey haguã itúva rendápe oñembo’e iñirũnguérare ha he’i: Che Ru, umi nde reiporavo ha eme’ẽ va’ekue chévepe aikuaauka mávapa Nde, amoguahẽ chupe kuéra ne ñe’ẽ, oreko haguã tekove opa’ỹva.

Opa mba’e ñame’ẽva ñande rapichápe niko ituja ha oñembyaíne chugui ha noñembyaíri ramo ohejáta avei ko yvy ári amo ipahápe. Hesu he’i pe opa’ỹva ha opytáva opa ára guarã ha’e jaikuaa Ñandejárape, ha jahayhu Hesúpe. Jajerovia iñe’ẽre, ha upéva ome’ẽha ñandéve tekove opa’ỹva.

Ha mba’eichaitépa epensa che reindy ha nde che irũ ikatúne jaikuaave jahávo Ñandejárape. Toikeve ñane korasõme Hesu ñanembo’éva, tajahayhuve ichupe, jareko haguã pe tekove opave’ỹva. Mba’épa reñandu ikatúne nepytyvõ ani haguã ejavy upe tekove añete Ñandejára ome’ẽséva ndéve.

Pa’i Alberto Luna.