Ñahendu Hesu Ñe’ê. Miércoles 22º Durante el Año

Escucha el evangelio y la reflexión en: http://misaguarani.com/wp-content/uploads/2022/08/6.-Miércoles-22-TDA.mp3

       

Miércoles 22º Durante el Año San Lucas 4, 38 – 44

Upérõ Jesús osẽ oho tupaógui ha oguãhẽ Simón rógape. Ha oje’e chupe Simón rembireko sy hasyha hína, tuicha iñakãnundu. Jesús oñemboja hendápe, ha oipe’a ichugui pe akãnundu. Upepete voi opu’ã, ha oñemoĩ oservi chupe ha umi hendive oĩvape.

Ka’aruetévo, kuarahy oikévoma, heta ha opaichagua hasýva ojereru Jesús rendápe. Ha ha’e omoĩ ipo peteĩ-teĩre ha omonguerapa. Ha hetágui osẽ demóño kuéra osapukáiva:— Ndéko hína Ñandejára ra’y.

Jesús katu oja’o umi demóñope, ha ndohejái chupekuéra oñe’ẽ. Umíva niko oikuaa Jesús ha’eha pe Mesías. Ko’ẽmba potávo, Jesús osẽ oho peteĩ hendápe ha’eño oĩ haguãme. Umi héntekuéra katu oguãhẽ hendápe, ha ojerure chupe ani haguã oho mamove.

Jesús katu he’i chupekuéra: — Ahenduka vaerã niko avei ko ñe’ẽ porã Ñandejára Rréino rehegua opa henda rupi. Upevarã niko añembou va’ekue. Ha osẽ oho Jesús. Ha mamo tupao ojuhuhápe Judea rupi, ohenduka iñe’ẽ.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE

Tuicha mba’e pe Ñandejára oguahẽ ñande rógape aje. Oiko jave ñembo’e, santo térã Tupãsy oñemongorrévo hamba’e. Misión jave oúvo misionero kuéra, Ñandejára rembijokuái, Pa’i, Hermana, oñembo’e ha ñande rovasa. Tuicha ñanembopiro’y.

Ñahendu Jesús oguahẽ Pedro rógape. Upépe ojejerure oho haguã kuña karai óga jára iñakanundúva rendápe. Oiméne ko oreko heta mba’e ojopýva ha ombohasýva ichupe upe ogapýpe voi, ndaikatúiva ha’eño omohendapa.

Oikotevẽ ou Jesús hendápe oñembo’e hese, ha ohovasávo ome’ẽ ichupe pytu’u ha py’aguapy. Ha omonguerapa riremínte ichupe, pya’ete opu’ãma voi ha omoĩ chupe kuéra opa mba’e oikotevẽva. Ha hetaiterei oime ojererúva Jesús rendápe ha’e omoĩ haguã ipo hesekuéra.

Jesús katu ndopytái upépente, upe oime porã háme, oikuaágui hetaiteve oĩha opytapa reíva upérupi, oikotevẽva hese. Ha peichaite avei oime ko’ãga, che reindy ha nde che irũ, heta ñande rapicha oha’arõva Jesús pe, oikotevẽva iñe’ẽ. Heta mitã, mitã rusu, kuimba’e ha kuña, omendáva, karai ha kuñakarai, tuja ha guaiguĩ ha’eñóva, hasýva oha’arõva Jesús oguahẽ hendápe.

Ajépa ñaikotevẽ ñande rapicha okorréva óga ha pueblo hárupi, capilla hárupi, ohóva umi hospital pe oguahẽ, oñandu hasýva, oñembo’e hesekuéra ha ohovasa. Umíva hína, Jesús ojapo haguéicha, omyasãi pe ñe’ẽ porã Ñandejára Rréino rehegua.

Ñañembo’e umi misionero ha misionera rehe, ohejáva hóga ha ihénte kuéra Ñandejára rayhupápe, omoguahẽ haguã hetápe Ñandejára grásia marangatu.

Pa’i Jasy.