Ñahendu Hesu Ñe’ẽ. Miércoles de la octava de Pascua

Escucha el evangelio y la reflexión en: https://youtu.be/-CIN_Ugm6uE

Miércoles Octava de Pascua

Lucas 24, 13 – 35.

Upéva upe árape voi, mokõi Jesús disípulo oho hína Emaús puéblope, opytáva 11 km rupi Jerusaléngui. Ha oñe’ẽ ohóvo hikuái umi mba’e ojehu vaekuére. Oñomongeta jave ohóvo hikuái hína, Jesús ete voi oñemboja hendápe kuéra ha oguata ohóvo hendivekuéra. Ha umi mokõi ohechárõ jepe chupe, ndoikuaái mávapa ha’e. Jesús osẽ oporandu chupekuéra: — Mba’e rehe piko peñomongeta pehóvo.

Ha opyta oñembo’y umi mokõi, hovasy hikuái. Upépe, pe Cleofás hérava osẽ he’i Jesúspe: — Ndénte piko opa Jerusalengua apytépe upe ndereikuaáiva pe ojehu va’ekue ko’ã ára ohasa va’ekuépe. Jesús he’i chupekuéra: — Ha mba’éiko ojehu.

He’i chupe hikuái: — Ku Jesús Nazaretguápe ojehu va’ekue. Proféta mbarete va’ekue niko ha’e opa mba’épe, Ñandejára renondépe ha opavave renondépe. Upéi katu ñande pa’i ha ñande ruvichakuéra omosãingo kurusúre. Ore niko roimo’ã ha’e hague pe ou va’erãva osalva Israélpe.

Ha ojapóma mbohapy ára omano hague. Ko pyharevépe katu, kuñanguéra oĩva ore ndive tuicha ore mondýi. Oho ra’e hikuái ko’ẽ mboyve pe hete oñemoĩ haguépe. Ha ndojuhúimarõ upépe hetekue, ou hikuái omombe’u oréve aipo Ñandejára ánhel ojechauka hague chupekuéra.

He’i ndaje chupe kuéra umi ánhel, Jesús oikove jey hague. Oĩ katu ohóva ore apytégui ohecha haguã añetépa pe he’íva umi kuña, ha ojuhu hikuái peichaha. Jesúspe katu ndohechái hikuái.

Upépe Jesús he’i chupe kuéra: — Peichaite peve piko pene resatũ ha pende py’a ratã kuaa. Hasyete piko peẽme perovia haguã umi mba’e proféta kuéra he’i va’ekue.

Ndapeikuaái nga’u piko pe Mesías ohasa vaerãha voínte ko’ã mba’ére ojupi mboyve Ñandejára ndive yvágape.

Upéi oñemoĩ omyesakã chupe kuéra umi Ñandejára Ñe’ẽme oñe’ẽháme hese.

Oñepyrũ umi Moisés oheja vaekuégui ha oguãhẽ umi proféta he’i va’ekue peve.

Oguãhẽvo hikuái Emaúspe, Jesús ojapo ku ohovétarõ guáicha hapére. Umi disípulo katu he’i chupe: — Epytána ore ndive. Ka’aruetéma niko, ha agãitéma pytũta hína.

Ha opyta Jesús hendivekuéra. Ha oñemohendávo hikuái mesápe, Jesús ohupi ipópe pan, ome’ẽ grásia Ñandejárape, omboja’o ha ome’ẽ chupekuéra.

Upépe ojehesa pe’a sapy’a hikuái ha oikuaa Jesúspe. Ha’e katu ndojehechavéi sapy’a hendondépekuéra. Ha he’i hikuái ojupe: — Ajeve niko ra’e túky-túky ñande py’a jajúvo tapére ha omyesakãvo ñandéve Ñandejára Ñe’ẽ.

Oha’arõve’ỹre, ojeity hikuái tapére ha ojevy hikuái Jerusalénpe. Upépe ojuhu ijatypa umi 11 apóstol ha iñirũnguéra. Umíva osẽ he’i:

— Añete nimbo ra’e Ñandejára oikove jey hague. Ojechauka kuri Simónpe.

Upépe umi mokõi omombe’u mba’épa ojehu chupe kuéra Emaús rapére, ha mba’éichapa oikuaa hikuái Jesúspe pan omboja’óvo.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE

Oime ñande rapicha heta oguata rire jerovia pópe ikane’õ ha ojehejáva, ikangy, nosẽi ichupe ha’e oimo’ã ha oipota haguéicha. Jahecha ave ko’ã mokõi disípulo oho jeýva hógape Hesu omano rire, opáma chupekuérarã pe jerovia. He’i ningo San Ignacio pe aña ndaje ñande pe’a haguã Ñandejáragui oñanduka ñandéve ate’ỹ, kãngy, vy’a’ỹ, ombokuchu ñane akã ha omohũ ñande rape. Upéicha ñandepo’o pe komunida atýgui.

Hesu katu oñemboja ko’ã mokõire ha oñepyrũ oñemoñe’ẽ chupekuéra, ohesape’a ha omokyre’ỹ ijeroviápe, omosã jevy ichupekuéra. Ha ndépa che reindy, ha nde che irũ, mba’eteko reime nde guatápe. Noiméipa ne tyre’ỹ ha neño iterei mba’e reguata reína.

Pa’i Alberto Luna.