Ñahendu Hesu Ñe’ẽ. Sábado 24º Durante el Año

Escucha el evangelio y la reflexión en: https://youtu.be/ri731C8qjdE

Sábado 24º Durante el Año Lucas 8, 4 – 15

Heta umi oúva opáguio ohecha hag̃ua Jesúspe. Ha oñembyatypa ijerére hikuái. Jesús omoĩ chupekuéra ko káso. Oiko ndaje raka’e peteĩ karai ohóva ikokuépe oñemitỹ hag̃ua. Ha omosarambi aja pe oñotỹva, oĩ umi ha’ỹingue ho’áva tapépe.

Upépe oñepyrũmba hese ha ou guyrakuéra ha ho’upa. Oĩ avei ho’áva itatýpe. Heñóivo katu ipirupa, yvy nahe’õigui. Oĩ avei ho’áva
ñuatĩndýpe. Hoky rire katu, umi ñana pya’e omo’ãmba ha ojukapa. Oĩ katu ho’áva yvy porãme. Umíva okakuaa ha hi’a porã. Oĩ hi’áva 100 peteĩ ha’ỹigui.

Upéi katu osẽ Jesús he’i: — Ohendu kuaávake tojapysaka.

Jesús discípulokuéra niko oikuaase mba’épa he’ise pe káso ha’e omombe’u va’ekue. Ha oporandu chupe hikuái.

Jesús he’i chupekuéra: — Peẽme niko añeha’ã amyesakã Ñandejára Rréino. Ambuépe katu amoĩ chupekuéra káso. Péicharõ, oma’ẽ-ma’ẽve ramo jepe hikuái, ndohechamo’ãi mba’eve. Ha ohendu-henduve ramo jepe, ndoikuaamo’ãi mba’eve.

Pe oñemitỹva káso niko he’ise kóva: Pe semílla niko hína Ñandejára Ñe’ẽ. Umi tapépe ho’a vaekue, umíva hína umi ohendúva Ñandejára Ñe’ẽ. Upéi katu ou chupekuéra Aña ha oipe’a ikorasõgui, ani hag̃ua ojerovia Ñandejárare ha ojesalva.

Umi ho’a vaekue itatýpe katu, ojogua umi Ñandejára Ñe’ẽ ohendu ha ogueroviáva vy’apópe. Ha ndahapo pypukúigui, sapy’ami ojerovia Ñandejárare. Ág̃a ojepy’a ra’ã mba’e ramo sapy’a, ikangypa.

Umi ho’a va’ekue ñuatĩndýpe, umíva hína umi ohendúva, ha mbegue-mbeguépe ipytupáva ohóvo. Upéva ojehu chupekuéra ojepy’apýgui ijehe. Pláta pota ha vy’ápente oikose. Ha mba’evépe nosẽi hikuái.

Umi ho’a va’ekue yvy porãme katu hína, umi ohendúva Ñandejára Ñe’ẽ ha oñongatúva ikorasõme. Ko’ãva hína umi oñemohatãva ijeroviápe ha hembiapóre jahecha heko porãha.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

“Opavavépe guarã oĩ Ñandejára”. He’i ningo ñe’ẽ. Tape yképe oimévape, itatýpe oñemohatãva, ñuatindy ha javoráipe iñapañuáiva, ha yvy porãme oha’arõvape. Opavavépe Ñandejára Jesucristo omoguahẽ iñe’ẽ ha ohenói.

Ha pe Jesús ñe’ẽ porãite, upe ñehenói ojapóva ñandéve jaguata haguã hendive niko ha’e peteĩ semíllaicha. Ndaha’éi tuicha pararãme oguejýva, térã mbaretépe ñane myañáva. Vevúi asy oñehenduka ñande apysápe, oguejy ñande py’ápe, ha ñane konvida porãiténte, ñamboguapy haguã ñande jehe, jaipotáramonte.

Hi’ãite va’erã niko, ajépa che reindy ha nde che irũ, oguapy ñande py’a rehe pe Jesús semilla porã. Ani ñañemohatã. Jaipe’a ñande apysa ha ñamohu’ũ ñane korasõ. Taheñói, toñembohapo, tokakuaa ha tahi’a ñande rekovépe opaichagua mba’e porã.

Pa’i Jasy.