Ñahendu Hesu Ñe’ẽ. Viernes 25º Durante el Año

Escucha el evangelio y la reflexión en: https://youtu.be/gQRjLHYGe6E

Viernes 25º Durante el Año Lucas 9, 18 – 22

Peteĩ ára, oñembo’e jave hína Jesús ha’eño, idisípulokuéra oñemboja hendápe. Jesús osẽ oporandu chupe kuéra: — Mavaha che piko oje’e upe rupi.

He’i chupe hikuái: — Oĩ he’íva nde rehe, nde Juan Bautistaha. Oĩ katu he’íva ndeha Elías, ha oĩ ave he’íva ndeha proféta yma guare, oikove jey vaekue.

Jesús oporandu chupekuéra: — Ha peẽiko mba’e peje. Mávaiko che.

Pedro he’i chupe: — Nde niko hína pe Mesías, Ñandejára omboúva.

Jesús katu heta he’i idisípulokuérape ani hag̃ua omombe’u avavépe.

Jesús he’i avei idisípulokuérape: — Che niko heta ahasa asýta hína. Heta ojahéita che rehe ñande ruvicha kuéra, pa’i kuéra, ha umi Moisés léi ombo’éva. Che juka va’erã ág̃a hikuái. Mbohapy ára haguépe katu aikove jeýta.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Heta niko oĩ oñe’ẽva Jesús re ha omoherakuãva Jesús ñe’ẽ, omoñe’ẽva Biblia. Oĩ télepe osẽva ikatólikova, oĩ evangélico, oĩ obispo, pa’i, pastor. Oĩ radio ha canal católico, radio ha canal evangélico. Oĩ oguahẽva ñande róga rupi, ome’ẽva ñandéve kuatia, revista, ñane konvidáva jaha haguã ñañembo’e itupaópe, misa hápe, culto pe. Oĩ oñemoñe’ẽva aty guasúpe. Opáicha ñahendu oñemoherakuã Jesús.

Umi apóstol kuéra omoirũva Jesús pe avei niko ohendu raka’e heta ñe’ẽ Jesus re oje’éva. Ha Jesús ohechakuaa hesekuéra okañyha ha nahesakãiha ichupekuéra mávapa añetehápe ha’e imbo’ehárakuéra. Ha oñemongeta hendivekuéra, oporandu tenonderã mba’épa oje’e upérupi, mba’épa ohendu hikuái oikóvo. Ha upéi katu oporandu porã mba’etépa oñandu, mba’eichaitépa ohecha hikuái.

Ñande avei jahechakuaa oĩha heta ñe’ẽ Jesús rérape ñahendúva. Ndaha’éi ñane ño ñanemandu’áva hese. Ñane gentekuéra apytépe voi, ñane irũ nguéra ha ñane vecino sapy’ánte oime peteĩ tupao guáva, católico, oime evangélico. Oime katu avei ojahéiva tupao, Ñandejára, pastor ha pa’i kuérare. Ñande jopara.

Opáichavo, ndaha’éi jajapysaka térã jalee haguére jaikuaa porãtama mávapa Jesús. Tekotevẽ jaguata umi hese ojeroviáva ndive, ñande Iglésiape, ha jahasa umi Jesús ohasa hague rupi. He’i niko San Agustín: “Peteĩ cristiano porãgui niko ñaha’ãro ojapo tembiapo porã ha, ombohováivo aña, toime avei ohasa asy haguãicha Ñandejára ha hapicha rayhupápe. Pe cristiano ikangýva katu hína pe ojaposéva umi mba’e iporãvante ha noiméi, térã ndaipu’akái, ohasa asy haguã Ñandejára ha hapicha rayhupápe.”

Mba’etekópa hína che irũ ha nde che reindy la nde py’a Jesús oporandúvo ndéve mávapa ha’e ndéve guarã. Reiménepa epyta haguãicha hendive umi Aña rymbakuéra nde rovapete vove.

Pa’i Jasy.