Ñahendu Hesu. San Juan Bautista ára

Escucha el evangelio y la reflexión en: https://youtu.be/mCcXwreTSfg

24 junio: San Juan Bautista ára

Lucas 1, 57 – 66. 80

Isabel imembývo, opa umi hóga jereregua ha hogaguakuéra oho joa oguerohorývo chupe. Ohecha kuaa hikuái Ñandejára ipy’a porã hague hendive. Ha 8 ára haguépe ogueraha hikuái pe mitã osirkunsida haguã. Ha omoĩse mo’ã chupe hikuái itúva réra, Zacarías. Isy katu he’i: — Nahániri. Héra vaerã Juan.

Ha umi oĩva upépe he’i chupe: — E’a, pende apytépe niko ndaipóri avave péicha hérava.

Upémarõ, oporandu hikuái Zacaríaspe mba’éichapa omboherase pe mitã. Zacarías ojerure peteĩ pisárra, ha omoĩ hese “Juan hérata”. Ha opondera joaite hikuái.

Upépe, Zacarías oñepyrũ jey oñe’ẽ, ha oñemoĩ omomba’e guasu Ñandejárape. Umi hóga jerére
oikóva opondera joa. Ha opa Judá sérro pa’ũ rupi herakuã pe ojehúva. Ohendúva guivénte he’i: “Mba’e apoharãnepa ko mitã”. Ohecha kuaa niko hikuái Ñandejára oĩha hendive.

Juan okakuaa ohóvo, ha Ñandejára espíritu omombarete chupe ára ko’ẽre. Ha oho oiko umi desiértore, Ñandejára ogueru jey peve chupe ohenduka haguã iñe’ẽ Israelguápe.

Ñandejára Jesucristo ñe’ẽ

ÑAMBOGUEJY ÑANDE REKOVÉPE…

Ñanemandu’ami imembýramo ñande rogagua, ñane hénte, térã ñande vesína.

Ojeho joa ojecha upe mitã oguahẽva. Ha oĩma katu ñemongeta mba’éichapa hérata, orahátapa itúva, isy, ijaguélo, itia, ihénte kuéra réra. Térã mba’e sánto árapepa ou hamba’e. Juan Bautísta onace ramo guare niko ou la hénte ohecha ramo, ijurujaipa ha he’i joa hikuái: ¿Mba’épa oikóta chugui okakuaa vove?

He’i ningo ñande ypykue guaraní, peteĩ mitã oúramo, ñande ru kuéra ombouha chupe ha oñemboapyka yvy ári opavave apytépe. Ha upe ñemboapyka ningo he’ise hina pe mitã, oguapy vaerã ñande apytépe, oreko vaerã hendaguã, ija va’erã pe familia, pe komunida pa’ũme. Ndaikatúi hemby, ndaikatúi oñembo’yke, ha’égui ñande rukuéra remimbou.

Jahecha mba’éichapa Isabel imemby ramo guare, oñeme’ẽ imembýpe héra, he’iseva ojeapoha mba’érõ. Heta mitãgui oñenega pe itúva réra, itúva apellido, chímboicha ojereko. Ha pe mitã oúva, peteĩ teĩ ndou reíri, upéva oreko hendaguã, oreko hembiaporã, imisión ko yvy ári.

Ñandejára ojokuái chupe, márãve ndoikói yvypóra ndohechakuaái ramo, péva ndoipe’ái hína ichugui pe oguerúva ijehe opa ára guarã. Ha ndépa che reindy ha che irũ, mba’éicha reñemoguahẽ raka’e renase ramo guare.

Mávapa nde paíno ha ne maína, nde rupi ha nde guerohory vaekue. Oiménepa ne héntekuéra apytépe, mitã oñembotapykuéva, tekotevẽva ñambojeroviave ha ñame’ẽ ichupe hendaguã ñande apytépe. Mba’éichapa ikatúne péva jajapo.

Pa’i Alberto Luna.