Ñahendu Hesu. Viernes 8º Tiempo Durante el Año

Escucha el evangelio y la reflexión en: https://youtu.be/92j_fAwgGbY

Viernes 8º Tiempo Durante el Año

Marcos 11, 11-25

Jesús oikévo Jerusalénpe, oho tupaópe. Ha omañamba heta porã rire opa mba’ére ha ka’arúguima, osẽ oho Betániape umi 12 idisípulo ndive.

Ko’ẽ rire, Jesús ha idisípulo kuéra osẽ oho Betániagui. Tapére, Jesús oñandu sapy’a iñembyahyiha. Mombyrymi ohecha peteĩ ígo máta hoguepáva hína, ha oho ohecha hi’ápa. Ha hoguepa ramo jepe, ndojuhúi mba’evete. Ndaha’éi niko ígo hi’aha tiémpo. Ha ojere Jesús he’i pe ígo mátape: — Avavéma ndo’u mo’ãi nde’a. Ha idisípulokuéra ohendu upéva.

Jesús ha idisípulo kuéra oguãhẽ rire Jerusalénpe, Jesús oho tupaópe ha omosẽmba upégui umi oñemúvape. Oĩ upépe umi pláta okambiáva hamba’e tupao ofrendarã.

Umíva mesa oitypa yvýre. Umi pykasu ovendéva renda katu ojapetepa yvýre. Ha ndohejái avavépe oike tupaópe mba’eve reheve ipópe. Upéi oñemoĩ ombo’e chupekuéra he’ívo: — Ñandejára Ñe’ẽme niko he’i, “Che róga niko óga ñañembo’e haguã, opavavépe guarã taha’e-ha’éva tetãgui oúva.” Peẽ katu pejapo chugui mondaha kuára.

Upéva ohendúvo, umi pa’i ha Moises léi ombo’éva oñepyrũ oheka mba’éichapa ikatúne ojuka hikuái Jesúspe. Okyhyjepa katu chugui hikuái, opavave opondera joágui umi mba’e ha’e ombo’évare. Pyhare oguãhẽvo katu, Jesús ha idisípulokuéra osẽ Jerusaléngui.

Ko’ẽ rire, Jesús ha idisípulokuéra ohasa pe ígo máta ypy rupi, ha ohecha hikuái ipiru paite hague, hapo peve. Ha Pedro imandu’a upe Jesús he’i va’ekuére pe ígo mátape.

Ojere he’i Jesúspe: — Mbo’ehára, emañami. Pe ígo rejahéi vaekue hese kuehe ipiru.

Jesús he’i: — Pejerovia Ñandejárare. Añete ha’e peẽme, pejerovia añetérõ Ñandejárare peje kuaa ko sérrope, “Ejehapo’o. Epu’ã tereho ejeity ýpe”, ha oikóta upe peẽ pejéva.

Upévare ha’e peẽme, “Opa mba’e pejeruréva peñembo’e jave, oñeme’ẽta peẽme pejerovia ramo Ñandejárare”. Ha peñembo’e jave, peheja rei pende rapichápe umi mba’e ojapo va’ekue pende rehe. Péicharõ pende ru yvágape oĩva oheja reíta avei peẽme pene rembiapo vaikue.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Tupao guasu Jerusalénpe heta ijaty ou ha ohóva, oñemu ha ojoguáva oikuave’ẽ haguã Tupãme. Péicha avei pe ígo máta oĩva tapépe, jepevérõ heta hogue ha’e ndahi’ái Hesúpe guarã.

Ñama’ẽmíkena che reindy ha nde che irũ, ani ñande tupao ohopa hunción guasúpe, tyapu, mba’e vera, ñemu ha mba’e joguápe. Ha ipahápe ndajakakuaái ñande jeroviápe, nañahendúi Hesúpe ñande py’aite guive. Aníkena ñande piru ha japyta rei pe ígo mátaicha ohopáva hoguépe ha ndahi’áiva avave peguarã.

Pa’i Alberto Luna.