Ñahendu Jesús. Jueves después de Ceniza

Escucha el evangelio y la reflexión en: https://youtu.be/7DoxC7S9KSw

Jueves Tanimbu ára rire Lucas 9, 22- 25

Jesús he’i idisípulokuérape: — Che niko heta ahasa asýta hína. Heta ojahéita che rehe ñande ruvichakuéra, pa’ikuéra, ha umi Moisés léy ombo’éva. Che juka va’erã ágã hikuái. Mbohapy ára haguépe katu aikove jeýta.

Upéi ojere he’i opa umi oĩvape upépe: — Oĩ ramo pende apytépe che moirũséva pehejapa perekóva, pehupi pende apére pende kurusu, ha peju che moirũ. Pende rekovére pene rakate’ỹrõ, peñehundíta. Pemanórõ che rehehápe katu, peikovéta. Mba’épe piko iporã peẽme perekopa opa mba’e, ha upekuévo pende po rupiete peñehundi.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Oñeme’ẽramo ñandéve jaiporavo haguã jehasa asy térã jehasa porã apytépe, katuete jaiporavóta jehasa porã ha jajere mombyrýta jehasa asýgui. Ajépa. Oñeñe’ẽramo ñande rehe, ñande jaipota oñeñe’ẽ porã. Javy’a voi oiméramo imandu’a porãva ñande rehe.

Ikatúramo jajehekýi tembiapo pohýigui pya’e ñakañyta chugui. Jaiporavo jajapo haguã ivevúiva ha ñanembovy’áva. Péicha ko ñande.
Ijáramo ñandéve jarekopávo ñande pópe opa mba’e yvy arigua jaipotáva guive, anichéne jaheja rei. Ha Jesús ou he’i ñandéve: Mba’épa reguenohẽne che irũ reguerekopárõ opaite mba’e yvy árigua nde pópe, ha reñehundi ramo nde, rehundíramo nde rekove. Ha ñama’ẽ porã ramo, sapy’ánte jahayhúgui mba’e reta ikatu jaju jajapo jajapo’ỹ va’erã. Ñande japu, ñambotavy ñande rapichápe. Ha ikatu voi avei jaike
karréra vaípe mba’e. Ñanemonda, jaike corrupción pe hamba’e.

Jesús ohechakuaa iñirũ rehe ikangyha. Ha’eño ha ijeheguínte ramo ndoho puku mo’ãi. Ñandéicha avei. Upévare ha’e opuntea ha oipe’a ichupekuéra tape. Hesarái ijehegui, ohupi ikurusu, ombovevúi haguã ñandéve ñande kurusu.

Upe ñande ndajaropu’akáiva ha ñanemokechẽva, upéva ha’e ohupi ñanendive. Umi jeja’o, jehova api nañande py’áiva ñambohasa haguã, ha’e omboguapy ijehe ñanemombarete haguã. Orekose rangue opa mba’e yvy arigua ipoguýpe ha’e ou ome’ẽ hekove ñande rayhupápe. Jahechápa nañande pe’ái Aña poguýgui.

Jesús hína ñande guéi puntéro che irũ ha che reindy. Ha’e hína pe ohupíva júgo pohýi tapére. Hendive ñañemosãro ikatúne avei ñande jaropu’aka umi ñande kurusu’i ára ko’ẽre ñamboguatáva ha jajehekýi ñuhã vaígui.

Pa’i Alberto Luna.