Ñahendu Jesús. 3 enero: Feria de Navidad

Escucha el evangelio y la reflexión en: https://youtu.be/h-mqsOT5viU

3 de enero San Juan 1, 29-34

Upe ára ko’ẽme, Juan ohecha Jesúspe oñembojáva oúvo hendápe. Upépe osẽ he’i: Péina ápe ou hína Ñandejára ovecha ra’y oipe’átava opavavégui ipekádo. Ha’e hína upe che mandu’a hague peẽme ku ha’érõ guare: “Che rire oúta peteĩ tuichavéva chehegui, ha’e oikove haguére che aikove mboyve.” Chete voi ndaikuaái vaekue mávanepa ha’e. Péicharõ jepe, pomongarai aikóvo ýpe, opa Israelgua oikuaa haguã mávapa ha’e.

Che ahecha va’ekue Espíritu Santo oguejýva yvágagui ku pykasúicha ha opyta hi’ári. Upérõ, che ndaikuaái vaekue mávapa ha’e. Upe che mbou vaekue chéve pomongarai haguã ýpe, ha’e he’i va’ekue chéve: “Upe rehecháva Espíritu Santo oguejyha hi’ári, upévata hína upe oporomongaraíva Espíritu Sántope”. Chete voi ahecha va’ekue, ha aikuaa porã Tupã Ra’yha ha’e.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Oime niko heta mba’e ñande jaikuáava oñemombe’úgui ñandéve, jalee haguére térã ñahendu ha jahecha haguére radio térã télepe. Ha oime katu umi jaikuaáva ñandete voi jahasa haguére, jahecha, japoko ha ñañandu haguére ñande pirépe. Umíva oguapy ha opoko
pypukuve ñande rehe, ndoje’ói ñande py’águi péicha péichante.

He’i niko Juan Bautista ha’e oikuaaha Jesús ou va’erãha, ha oñanduha Túva Ñandejára ojokuaiha ichupe ojapo haguã tape Jesús pe, ikatu haguãicha oha’arõ ichupe umi Ñandejára pueblo guáva. Ha upéi ojuhu rire Jesús pe, ohecha ha ohendu rire ichupe, opoko
rire hese, oikuaa rire mba’éichapa Ñandejára añete omba’apo Jesús rupive, hatãvéntema he’i opavavépe Jesús añetehápe ha’eha Ñandejára remimbou.

Heta niko ñande ñahendu Ñandejáragui. Ikatu avei jalee ñande jehegui pe Ñandejára ñe’ẽ, jaha misa térã ñembo’e hápe, ha upérupi jaikuaave Jesús gui heta mba’e. Opáichavo peteĩ mba’e hína pe jaikuaáva ñane akãme ha otro merõ hína upe jajapóva, upe oguejýva
ñande py’ápe ha ñanemomýiva ñande rekovépe.

Mba’épa reñandu che reindy ha nde che irũ jajerure ramo Ñandejárape ko áñope jajuhu haguã Jesús pe ñande rapépe, ha ñañandu pypukuve haguã ichupe ñande rekovépe.

Pa’i Jasy.