Ñahendu Jesús. María Korasõ Mara’ỹ

Escucha el evangelio y la reflexión en: https://youtu.be/kwYaZq-SbWw

María Korasõ Mara’ỹ Lucas 2, 41 – 51

José ha María ohómiva áño jerére Jerusalénpe Páskua areterã. Jesús ombotývo 12 áño, oho avei túva ha isy ndive Jerusalénpe. Pe arete ohasapa rire, ojevy hikuái hogaperãicha. Ha José ha María ohecha kuaa’ỹre, Jesús opyta ra’e Jerusalénpe. Oimo’ã hikuái Jesús ouha hína hapicha kuéra apytépe. Ha ka’arúmavo, oñepyrũ oheka chupe ihéntekuéra ha ikuaahakuéra apytépe, ha ndojuhúi.

Upémarõ ojevy hikuái Jerusalénpe hekávo. Mbohapy ára rire ojuhu chupe Tupaópe oguapy hína umi Moisés léy ombo’éva apytépe. Ojapysaka hesekuéra ha omba’e porandu hína chupekuéra. Ha opa umi ojapysakáva, ohecha ramoite.

Ijurujái opytávo hikuái ohechávo mba’éichapa iñarandu, ha hekoitépe he’iha opa mba’e. Túvakuéra ohechávo chupe, ipy’andýi. María he’i chupe: — Che memby, mba’éreiko péicha rejapo ore rehe. Nde ru ndive niko opa rupi roheka roikóvo, ha heta rojepy’apy nde rehe.

Jesús katu he’i chupe: — Maerãiko che reka. Ndapeikuaái nga’u piko aime vaerãha che Ru rógape. Túvakuéra katu ndoikuaái pe he’íva. Jesús oho hendivekuéra Nazarétpe. Ha opa mba’épe iñe’ẽ rendúva túva ha isýpe. Isy María katu oñongatupánte ko’ã mba’e ipy’apýpe.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Mitã rembi’u, mitã ao, mitã ñepohãno, mitã karai, mitã jeho eskuéla pe, hamba’e; sýpe meme opyta jepi ymaite guive ñande róga kuéra rupi. Ñande sy kuérante voi pe oma’ẽva jepi, ohechakuaa ha omohendapa va’erãva opa ifamília remikotevẽ.

Oje’éva voi ningo upérupi: “Pévako kuña rembiapo, la patróna delihéncia ningo umíva”. Ha upéicha kuimba’ekuéra, túvakuéra ymave nombojere guasúiva voi mitãnguéra ha ohejapánte umi tembiapo kuñanguéra apére. Ñahendu angete mba’éichapa María ha José oho oñondive tupao guasu Jerusalénpe. Ha oraha avei Jesús pe hendivekuéra. Imitã rusúma voi ningo ohóvo Jesús py. Ha iporãma voi oikuaa ohóvo pe táva ha tupao guasu oĩva hetãme ha oho avei ha’e oñembo’e hendivekuéra upépe. Ñama’ẽvo hesekuéra jahecha mba’éichapa sy ha túva, María ha José, omboguata joja Jesús pe Ñandejára rapére.

Uperire katu ojerévo hógape rãicha, ñande ra’y okañy chuguikuéra. Opytami pe tupaópe ra’e ijeheguínte. Nomombe’úi itúva ha isýpe. Iñakã hatã imi raka’e upépe Ñandejára. Ha tapérema ohecha kuáavo hikuái pe mitã noimeiha iñirũ nguéra apytépe, py’a pererépe ojevy hikuái oheka ichupe puéblo guasúpe, henteta apytépe. Itarova mo’ã karai José ha Ña María ndojuhúi rire imemby oguapy hína
tupaópe umi pa’ikuéra apytépe. Ha omongavaju imi rire ogueru ichupe hikuái hógape okakuaapa peve.

ÑAÑEMBO’E OÑONDIVE

Ore sy María, ne ména ykére ejepy’apyete va’ekue ne memby rehe, okañýramo guare. Ema’ẽmína hetaite túva ha sykuéra, ojepy’apýva imembykuéra rehe ha ndoikuáaiva sapy’ánte mba’épa ojapóta, mba’éicha omoirũta, ohekombo’éta, omongarúta ha omondéta.

Ema’ẽmi umi sy ha túvakuéra rehe orekóva imemby mombyry, oikéva húnta vaípe, nomba’apóiva, hasýva, oiméva kárselpe. Ne korasõ mara’ỹ henyhẽ va’ekue Jesús mborayhúgui tombopy’aguapy ichupekuéra. Amén.

Pa’i Alberto Luna.