Ñahendu Jesús. Domingo 16º Durante el Año

Escucha el evangelio y la reflexión en: https://youtu.be/rSOFEPX2GO0

Domingo 16º Durante el Año. Ciclo C Lucas 10, 38-42

Upéramo, ohokuévo Jerusalénpe, Jesús ha idisípulokuéra oguãhẽ peteĩ puéblope. Upépe, peteĩ kuña hérava Marta omoguãhẽ chupe kuéra hógape Marta ndive oiko avei ikypy’y hérava María. Ha oho María oguapy Jesús ypýpe ha ojapysaka hína Jesús rehe.

Marta katu hembiapóva hína kosináme ha óga ñemopotĩme hamba’e, upéi oñemboja Jesús rendápe ha he’i chupe: — Mbo’ehára, nde rehechakuaái piko chenteha pe omba’apóva, ha María ndojapoiha mba’eve. Ere chupe ta che pytyvõ.

Jesús ojere he’i chupe:—Marta, Marta. Heta mba’ére niko rejepy’apy rei hína. Ha peteĩ mba’énte tekotevẽ. María oiporavo
pe iporãvéva, ha upéva ndoipe’a mo’ãi chugui avave.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Oĩ niko ñande rapicha iñate’ỹva ha oiko reisénteva. Ha jajeruréramo ichupe ñanepytyvõmi haguã, he’íne: Che jeýma. Ha oime avei tapicha omba’apóva ára ha pyhare ha ndaikatúiva ohecha hapicha oime reíva. Ja’éramo ichupe opytu’umi haguã, he’íne: ágã amano vove apytu’úne.

Ñamba’apo va’erã ningo, ajépa. Pe trabajo niko peteĩ mba’e porã opavave peguarã. Ñandejára niko oheja ñandéve ñanerembiaporã ko yvy tuichakue ñañangareko ha ñamoporãve haguã.

Nañamba’apói ha ndaikatúiramo jahupytyka ñande róga guápe oikotevẽva niko tesa parápe jajoecha. Ha pe ñanerembiapo, ñane apytu’ũ ha ñande ry’aikue rupive jahupytýramo ñaikotevẽva ñande rógape guarã, ao, tembi’u, escuela, pohã; niko ñañeñandu porã, ñande py’aguapy ha javy’a. Ha pe tembiapo niko tekotevẽ avei ñamopa’ũ, jake, japytu’u, ñañembopiro’y, jajotopa, javy’a oñondive, ha ñañembo’e.

Ñahendu angete Jesús oguahẽ Marta ha María rógape, ha upépe Marta ou ha oho aja kotýgui kosináme, María oguapy ijurujái ha ohendu Jesús pe. Ha péva ombopochy Martape ha ou voi Jesús pe ha’e omongavaju haguã Maríape, iñate’ỹ ha heko rei haguére. Ha upépe Jesús he’i porã pe ojapysaka ha ohendúva Ñandejára ñe’ẽre ndaha’éi hína tekorei. Ha ombo’e avei Marta pe tekotevẽha ha’e
omopa’ũ hembiapo oguapymi haguã avei ohendu mba’épa he’i Jesús.

Ndépa che reindy ha nde che irũ mba’e reñandu. Oimépa sapy’ánte Marta icha, hetaiterei nerembiapo ha nderasapa. Mba’épa he’ise ndéve guarã ko Jesús he’íva Marta pe: Rejepy’apy heta mba’ére ha peteĩ mba’énte upe reikotevẽva añetehápe. Peteĩ mba’énte upe reikotevẽva. Ha péva hína eipe’a ne rokẽ Jesús pe tanerekombo’e, toike nde rekovépe, ehendu ha eikuaave ichupe.

ÑAÑEMBO’E OÑONDIVE

Ñandejára Jesucristo, ejúva ore rendápe, esẽva ore rapépe ha embotáva ore rokẽ ára ha ára. Ore pytyvõmíkena romboyke haguã tembiapo eta rohendu haguã ndéve ha roñemopeteĩ haguã nendive. Amén.

Pa’i Alberto Luna.