Ñahendu Jesús. Domingo 21º Durante el Año

Escucha el evangelio y la reflexión en: https://youtu.be/gZHkq_qKLc8

Domingo Durante el Año Ciclo C. Lucas 13, 22 – 30

Upérõ Jesús oho jave hína Jerusalénpe, opyta puebloha rupi ha mba’e, ha upe rupi ombo’e. Peteĩ osẽ oporandu chupe: — Mbo’ehára, ndaheta mo’ãi umi ojesalvátava, aje.

Osẽ he’i Jesús: Peñeha’ã peike pe okẽ pychi’ĩ rupi. Cháke hetáta hína umi oikeséva Ñandejára Rréinope, ndaikatu mo’ãi ramo jepe oike. Ágã Ñandejára ombotývo hokẽ, peẽ okápe pepytáva peñemoĩne pesapukái, “Karai, eipe’ána oréve ne rokẽ.” Ha’e osẽne he’i peẽme, “Che ndapoikuaái.”

Ha upépe pesẽne peje chupe, “Roguapy vaekue niko rokaru hamba’e ne ndive. Ha nde ore mbo’émi va’ekue ore puéblo rupi.” Ha’e katu he’íta peẽme, “Che ndapoikuaái. Pe che reja, peẽ tekove ahẽ.”

Ha okápe pepytávo, peñemoĩne pejahe’o ha pende pochy pehechávo Abraham, Isaac, Jacob ha opa umi proféta kuéra oĩva hína Ñandejára Rréinope. Opáguio oĩta oúva oguapy okaru haguã Ñandejára Rréinope. Ha upépe, umi ko’ágã itapykuéva, tenondete oguapýta. Ha umi ko’ágã itenondéva, itapykuéta.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Ou vai vove ou vaipa. He’i ningo ñe’ē. Ha péicha ningo ñañandu ipohýi jave ñande rekove. Okañy ñande hegui vy’a ha ogue tetia’e. Ñamoĩ ichupe ñande rasykatúramo mba’e, térã katu ñane hénte mano jave. Jaikuaase voi ma’erãpa ñañeha’ã itereíta amo ipahápe ha ovalétapa
ñandéve upe ñanerembiapokue. Nañamboapu’ái vaicha ñande rekovemíme mba’eve.

Ñahendu angete Jesús oguata Jerusalén rapére. Oho hína upe ijetu’úta hápe hendive. Upépe jaikuaa ñande ha ha’e avei oñandupaitéma ohóvo hína hendýtaha hendive ha ojejopytaha ojejuka peve. Ha upéicharamo jepe Jesús oho hese, ndoguevíri. Ha’e voi ijehegui oike upe okẽ po’i rupi. Upérupi oñandu ha’e Ñandejára oipota oipykúi hape.

San Ignacio niko he’i upe ijetu’u ha jajejopy jave ñamombykyse ñane rembiapo, térã katu jahejase upe jajapóva, ñamoñepyrũ vaekue Ñandejára rayhupápe. He’i San Ignacio, ñane kangy ha ñaime vai aja naiporãi jaguerova mba’eve, japytánte va’erã upe jajapóvape. Jaha hese mbeguekatu mbói jo’ópe, jaiporu paciencia.

Ñaime vai aja niko iñypytũ ha ityai upe ñande py’a ha ñane akã kuchu. Péicha jave pe Aña espíritu hína upe ñanesambyhyvéva ha hendive ndaikatúi ñasẽ porã. Ñande py’aguapy vove katu niko Ñandejára Espíritu hína upe ñanesãmbyhýva.

Anietéke che reindy ha nde che irũ jajapura jaheja haguã ñane compromiso. Jahánte hína hese, ñaha’arõ tahesakãmive ñane korasõ, tañande py’aguapy. Ñañe’ẽ umi ikatúva ndive ñanepytyvõ. Ha upépe ikatúne jahecha porãve mba’épa Ñandejára oñanduka ñandéve.

Mba’épa oime tekotevẽva jaguerova ha jaheja, ha mba’épa iporãve jajapónte hína jahávo ha ani jaheja.

ÑAÑEMBO’E OÑONDIVE

Ñandejára Jesucristo, ndereguevíri va’ekue ijetu’úramo jepe. Aníkena reheja ipu’aka ore rehe py’amirĩ ha kyhyje. Embou oréve nde Espíritu Santo pu’aka, taorepy’aguasu ndéicha. Amén.

Pa’i Jasy.