Ñahendu Jesús. Domingo 6º Pascua

Escucha el evangelio y la reflexión en: https://youtu.be/WaqV6QhNPK4

DOMINGO 6º PASCUA Ciclo C Juan 14, 23 – 29

Upérõ Jesús he’i hemimbo’ekuérape: — Upe che rayhúva ojapo che ha’éva, ha che ru ohayhúta chupe. Ha rojúne che Ru ndive ha roiko hendive. Pe che rayhu’ỹva katu niko ndojapói che ha’éva. Ko’ã mba’e ha’éva peẽme, ndaha’éi che jehegui reínte ha’éva peẽme.

Che ru, che mbou vaekue ñe’ẽ hína ãva. Ko’ã mba’e ha’e peẽme aime aja gueteri pene ndive. Espíritu Santo katu, pe che ru omboútava che rérape pene pytyvõ haguã, ha’e pene mbo’éta opa mba’e ha pene momandu’áta opa ko’ã mba’e ha’éva peẽme.

Py’a guapy niko aheja peẽme. Py’a guapy che arekóva ame’ẽ peẽme, ha name’ẽi yvypórakuéra ome’ẽháicha. Ani pekyhyjétei térã pejepy’apy. Pehendúma niko ha’e hague peẽme ahataha, ha upéi aju jeytaha aime haguã pene ndive.

Che rayhu ramo añete, pevy’a va’erã peikuaávo ahataha che ru rendápe. Ha’e niko tuichave chehegui. Amombe’u hína peẽme ko’ã mba’e, ojehu mboyve. Péicharõ, ágã ojehu vove, perovia haguã ko’ã mba’e ha’éva peẽme.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Oiméramo oporandúva ñandéve moõpa ojuhúta Ñandejárape, moõpa ohóta hendápe oñembo’e ha oime haguã hendive. Ñande ja’éne ichupe: E’a, ha tupaópe tereho. Upéa ningo Ñandejára róga, Ñandejárare ojeroviáva oñembyatyha, ñembo’e oikoha. Ha ja’e voi niko ñande “tupao”, péva he’ise hína “Tupã róga”, Tupã oiko ha oimeha.

Ñande katu ningo jaikuaa umi cristiano ypy, Jesús irũnguéra, Iglesia guáva ymaite guare, ndorekói va’ekue tupao ñande jareko háicha ko’ãga. Ha’e kuéra oñemosẽ va’ekue umi judiokuéra tupao guasúgui Jerusalénpe, ha upémarõ oiko oñembyaty óga hárupi, umi
ojeroviáva róga rupi okorre ijaty hikuái oñembo’e ha ohendu Ñandejára ñe’ẽ.

Upéinteko, oiméne 300 áño rire mba’e, opa rire upe persecución puku cristianokuéra kóntrape, oñepyrũ oñemopu’ã umi tupao guasu ñande jahecha ha jaikuaa háicha ko’ãga.

Umi cristiano ymavegua oñandu raka’e pe ijatyhápe oñembo’e, upépe oimeha hendivekuéra Ñandejára. Upéicha voi niko Jesús he’i va’ekue: “Mokõi térã mbohapy ijatyhápe che rérape, upépe che aime hendive kuéra”. Aipóramo pe Tupã oimeha, Tupã róga ha’éta hína
pe komunida ijatyha Ñandejára rérape, taha’e mango guýpe, kállepe, térã Capilla pe.

Upeva he’i ñandéve Jesús ko árape: “Upe che rayhúva ojapo che ha’éva, ha che Ru ohayhúta chupe. Ha rojúne che Ru ndive ha roiko hendive”. Ñande aipóramo, che irũ ha che reindy, ñande jahayhúva Jesús pe, ñande ha’e hína pe tupao añete, Túva Ñandejára,
Jesús ha Espíritu Santo róga.

ÑAÑEMBO’E OÑONDIVE

Ore aguyje ndéve Ñandejára Jesucristo reikoségui orepype nde Ru ndive, ha embou haguére oréve Espíritu Santo oremboguata haguã ne mborayhu tuichaite rapére. Amén.

Pa’i Alberto Luna.