Ñahendu Jesús. Domingo 7º Pascua

Escucha el evangelio y la reflexión en: https://youtu.be/pGwyvezGKKE

DOMINGO 7º Pascua. ASCENSIÓN. Lucas 24, 46 – 53

Upérõ Jesús he’i idisípulokuérape: — Ñandejára Ñe’ẽme niko he’i voi pe Mesías omano ha oikove jey vaerãha mbohapy ára haguépe. He’i ave opa tetã rupi oiko va’erãha hese mandu’a, hérape maymáva ojevy haguã Ñandejára gotyo, ikatu haguãicha ha’e oheja rei
opavavépe hembiapo vaikue. Peñepyrũ vaerã Jerusalénpe voi pemombe’u opa ko’ã mba’e pehecháva. Che amboúta peẽme pe che Ru he’i vaekue omboutaha peẽme. Pepytamivéta Jerusalénpe ou peve peẽme py’a guasu oúva yvágagui.

Jesús ha idisípulokuéra osẽ oho Betániape. Upépe ohupi ha’e ipo ha ohovasa chupekuéra. Ha upe javete ojei chugui kuéra ha ojereraha yvágape. Idisípulokuéra omomba’e guasu rire Jesúspe, vy’apópe oho Jerusalénpe. Ha oho meme hikuái tupaópe omomba’e guasu haguã Ñandejárape.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Ndaipóri niko tapicha ikatu’ỹva ñande reja, ndaipóri hekovia’ỹ va’erãva. Hasy asýramo jepe ñandéve umi jahayhúva ojehekýirõ ñande hegui, térã katu osẽramo oho ha ñande reja rei mba’e. Iporeỹme mbeguekatúpe jaju jajepokuaa, jajetyvyro ha jaheka ñande jehegui mba’éichapa ñamboguatáta ñande rekove hese’ỹ

Oje’e niko ñandéve Jesús ojupi rire yvágape japytaha ñande cristiano Jesús rekoviáramo ha hendaguépe. Ha mba’épa ñane rembiaporã aipo ramo. Mba’épa Jesús oheja ñandéve jajapo haguã hekovia. Oime he’íva umíva oimembaha voi libro pe, Ñandejára ñe’ẽme.

Jesús katu nde’íri umi disípulokuérape ohecha va’erãha kuatia térã ohendu va’erãha iñaranduvévape. Jesús he’i ichupekuéra, ha ñandéve avei che irũ ha che reindy, omboutaha Espíritu Santo ñanembo’éva mba’épa jajapo va’erã ha ñanembopy’aguasúva. Heta mba’e oikóva ñane tiémpope ndoikói va’ekue ymave. Oñekambia ha iñambue heta mba’e ko ñane mundo pe. Ñande cristiano ndaikatuvéima jaiko ymave guaréichante.

Tekotevẽ ñamýi de otro ñahenonde’aséramo umi mba’e pyahu opu’ãva ñane renonderã, jaipe’a haguã tape pyahu ñamoirũ ha ñamokyre’ỹ haguã ipyahúva ijeroviápe. Ha sapy’ánte niko ndajaikuaái mba’épa jajapóta ha nañasẽi avei ñande guata tujágui. Hovayva ha ijurujái ndaje umi disípulo, oma’ẽ yvágare, Jesús ojupívo. Ha oje’e ichupekuéra anivéma haguã oma’ẽ yvágare. Oma’ẽ haguã haperãre, tohecha mba’épa oime ha oñeikotevẽ ijerére, umíva toñeha’ã ohechakuaa ha omohenda.

Umívape Espíritu Santo ñanemoirũta ha ohechaukáta ñandéve mba’etépa jajapo va’erã. Jesús avei niko ohokuetévo he’i ichupekuéra oimetaha hendivekuéra, ha ñanendive, opa araite.

ÑAÑEMBO’E OÑONDIVE

Ñandejára Jesucristo, nde orerejáva nde rekovia rejeroviágui ore rehe. Eme’ẽ oréve arandu ha py’aguasu, rojapo haguã nde rérape umi mba’e oñeikotevẽva ha iporãvéva. Amén.

Heta mba’e porã ikatu jajapo ñande rapicha oikotevẽva rehe, hasývape ikatu ñame’ẽ pohã, iñembyahýivape ikatu ñame’ẽ tembi’u, umi ndahógai ha ndaijyvýivape ikatu ñamoirũ oñeorganisa haguã ha ohupyty óga, yvy. Opa umi mba’e iporã ha ñande cristiano ikatu
ramo jajapo vaerã voínte, opáichavo nañaipytyvõiramo okakuaa haguã ijeroviápe Ñandejárare opa umi mba’e jajapóva ojogua peteĩ yvyra máta hakã ha hogue hetáva ha ndahapóivape.

Upe ñande rapo niko ha’e Ñandejára Jesucristo, ha hese ndajajoajúi ramo, tuicha ramo jepe ñande jerovia ikã ha ipirúta ñande hegui tapére. Pe tekove añete jahupyty jaikuaávo Jesucristo pe, upévare pe tekotevẽva jajapo ñande rapicha rayhupápe ha’e jaikuaa
jahávo oñondive Jesús pe, upéva nokañýi va’erã ñande hegui araka’eve.

Jesús omohu’ãvo hekove, ojupi mboyve itúva ykére, he’i apóstolkuérape opyta haguã oñondive. Péva ha’e hina tape ñañembohapo pypuku haguã jeroviápe. Jaguata ñande rapicha ojeroviáva ndive, japyta ñande Iglesia-pe, jako’i ñembo’e ha tembiapópe. Aña
ñanemosarambi ha ñanemoha’eño ipu’aka haguã ñande rehe.

Oñondive ha ñembo’épe he’i Jesús umi apóstolpe oha’arõ haguã pe pu’aka oúva yvatégui, pe pu’aka ome’ẽva Espíritu Santo. Ehekápa nde che irũ ha che reindy, ne irũrã ñembo’e ha jeroviápe, eñembyatýpa nde rapicha kuéra ndive eñembohapo mbareteve haguã Ñandejára rapére.

Pa’i Alberto Luna.