Ñahendu Jesús. Jueves 12º Durante el Año

Escucha el evangelio y la reflexión en: https://youtu.be/UlZ7DLxo_3o

Jueves 12º Durante el Año Mateo 7, 21 – 29

Jesús he’i opavavépe: ‘Ndaha’éiko hína umi chéve he’íva: “Ñandejára, Ñandejára”, umi oikétava yvágape, Tupã Rréino pe. Umi ojapóva che Ru yvágape oĩva rembipota. Umívante oikéta.

Ágã oguãhẽvo pe ára paha, heta oĩta he’íva chéve “Nde rérape niko heta roñemoñe’ẽ va’ekue. Nde rérape heta demóño romosẽ vaekue. Ha nde rérape rojapo vaekue heta milágro”. Ágã upévo, ha’éne “Che ndapoikuaái. Tapeho chéve águi peẽ Aña rymba.”

Upévare, pe ohendúva che ñe’ẽ ha ojapóva upe ha’éva, ojogua petei kuimba’e iñakã porãvape hogarã omopu’ã va’ekue ita ári. Upéi ou oky ha okakuaa umi rraudal. Yvytu hatã oipeju ha ojejapipa pe ógare.

Péicharõ jepe ndo’ái, oñemboguapýgui ita ári. Pe che rendúva ha ndojapóiva che ha’éva katu, ojogua ku tekove tavýpe, omopu’ãva’ekue hogarã yvyku’i ári. Upéi ou oky ha okakuaa umi rraudal. Yvytu hatã oipeju ha ojejapipa pe ógare ha sarambikuépe ho’a, oñembyaipaite’.
Jesús he’ipávo ko’ã mba’e, opondera joaite hikuái umi mba’e he’íva. Jesús niko oñe’ẽ karai guasúicha ndaha’éi umi Moise mandamiénto ombo’e vaicha.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Oime niko oñepyrũvo peteĩ tembiapo ohenóiva Ñandejára ha Tupãsy, ha he’íva ojapoha opa mba’e hérape. Jesús he’i ndaha’éi niko jajapo haguére Ñandejára rérape iporãta katuete pe jajapóva. Ndaha’éi ñahenói haguére Ñandejára ha sántokuéra oĩ háicha upe jajapóva ha’étama upe Ñandejára oipotáva.

Ikatu niko jajapo upe ñande jajaposévante, jajapo ñande gústo ha ja’e gua’u jajapo hague Ñandejára oipota háicha. Ikatu avei ñahendu Jesús ñe’ẽ ha jaiporavo umi ñahendusévante, umi nañandepe’a mo’ãiva ñande guatágui, ha ikatúva ñamohenda ñande gústope japyta
haguã ñaime háichante. Ha umi Jesús ñe’ẽ ojeruréva ñandéve jaguerova haguã ñande rekove, ñande jepokuaaha, ñasẽ ñane tránkogui katu ñambo’ykénte ha ñañembotavy ichugui. Nañahendúiramo guáicha. Ype apére y. Ohasánte ha ndoikéi.

Mba’épa nde reñandu hína che reindy ha nde che irũ, umi Jesús ñe’ẽ ijetu’u ha nde forsa léntova. Ha mba’etépa umi Jesús ñe’ẽ tekotevẽva ejapysaka porãve emopyenda mbarete haguã nde rekove. Ágã, ama pochy rupi Aña ndetyvyro vove, ani haguã ipu’aka nde rehe ha ndereity.

Pa’i Alberto Luna.