Ñahendu Jesús. Jueves 15º Durante el Año

Escucha el evangelio y la reflexión en: https://youtu.be/aFkxmd7Lto8

Jueves 15º Durante el Año Mateo 11, 28 – 30

Upérõ Jesús he’i: Peju che rendápe opa pene kane’õ ha pejejopýva, che pomombytu’úta. Pehupi che ndive pe júgo ha pejapo che ha’éva. Peikuaáta che py’a porãha ha ndajejapoiha. Che ndive pejuhúta pytu’u. Umi mba’e che amoĩtava pende apére niko ndahasy mo’ãi pejapo, ha ivevúita peẽme.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

“Esperanza nahavẽi ha consuelo ndaitujúi”. He’i ningo ñe’ẽ. Ha pe consuelo ningo peteĩ Ñandejára grásia neporãva. Ñanembyetia’e ha
ñanemokyre’ỹva opa mba’ére ñande pu’aka haguãicha. Jareko vove pe Ñandejára consuelo niko javy’a, ñande py’a porã, japorohayhu, jajerovia, háime javeve jaikóvo. Ivevúi ñandéve opa mba’e.

Jesús niko he’i va’ekue ijapóstol kuérape ha’e omano mboyve, oho rire omboutaha pe okonsola vaerã ichupekuéra. Ha péva ningo hína pe Espíritu Santo, omýiva ñande py’a ha ñane korasõme, ñanemombarete haguã Jesús rapére. Jajerure vaerã niko pe consuelo Jesús gui oúva ha ome’ẽva ñandéve Espíritu Santo. Peva’ỹre ko ndajaha mombyry mo’ãi.

Lo mitã he’i: ñande rekove mbyky, ha hi’ári henyhe problema gui. Ha oñekonsola haguã opoi ijehegui, omokõ, ofarrea, dróga jepe otantea, ombogue haguã vy’a’ỹ.

Umíva umi consuelo jepe ningo sapy’arãnte ome’ẽ vy’a, jepuka, sapukái, tetia’e. Ha uperire katu ñande reja porãve rangue, ñande reja vaikue, akã rasy, rresáka, pire vai, kane’õngue. Ha sapy’ánte katu oñemosã ñorairõ, pochy ha jeiko vai reheve. Ha oime avei ñanembohasy, ñanembyai ha ñanemondohóvama katu. Umíva hína consuelo japu.

Jesús ohenói oho haguã hendápe umi ikane’õ ha oiko asýva. Ha’e he’i ombovevuitaha pe omokarapã ha oity potáva ichupe kuéra. Ha ome’ẽta ave pe consuelo añete ogueropu’aka haguã pe ijúgo pohýi py’aguapy reheve. Hese ñama’ẽramo, jahecháta imánso ha ipy’a porãha. Hendive jajuhuta pytu’u añete. Ha pe vy’a, py’aguapy ha consuelo Ñandejáragui oúva ningo opyta pypukuve ñande py’ápe, ñane korasõme, ha ñande reja porã. Nañanembyaíri.

Ombohape mba’e porã ñande rekovépe, omyesakã ñande rekove ha ñanemoakãguapy. Jaikuaáma upéicharamo che reindy ha nde che irũ, mávandipa jaheka va’erã pe consuelo ha py’aguapy ñaikotevẽ jave.

Pa’i Alberto Luna.