Ñahendu Jesús. Jueves 2º Tiempo Durante el Año

Escucha el evangelio y la reflexión en: https://youtu.be/jCagnq2ePzc

Jueves 2º Tiempo Durante el Año Marcos 3, 7 – 12

Jesús ha idisípulokuéra heta Galileagua ndive oho mar rembe’ýpe. Oikuaávo umi mba’e ojapóva, oho hendápe heta Judeagua, Jerusalén, Idumea, Jordángui kuarahy resẽvo, Tiro ha Sidón guáva.

Upévare Jesús he’i idisípulokuérape ogueru haguã chupe peteĩ várko’i, ani haguã upe aty guasu ojopypa chupe. Omonguera haguére hetápe, umi hasýva ojeitypa hi’ári opoko haguã hese. Ha umi demóño katu ohechávo chupe oñesũ henondépe ha osapukái: Nde hína Tupã ra’y!

Jesús katu he’i chupekuéra ani haguã péicha he’i hese avave renondépe.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

“Paraguayo reikuaa haguã opoko mante vaerã hese”. He’i ningo ñe’ẽ. Ha ndopokóiramo ku ndohecháiramo guáicha voi. Ha upéicha ningo ñande, ajépa, ñañandu va’erã jaikuaa haguã. Ha upevarã niko jahecha ha japoko mante va’erã. Ha ajépa ñande jogua umi hénte Jesús vallegua. Ndohechái ha ndopokóiramo noiméiramo guáicha ichupekuerarã. Santo Tomáicha avei, ohecha ha opokoséva orovia haguã.

Ápe San Marcos omombe’u ñandéve mba’éichapa opaichagua hasýva, oúva mombyry mombyryvégui, oheka Jesús pe. Ha ojepoípa hi’ári, he’i. Opokose hese hikuái okuera haguã.

He’i ningo San Lucas ojapoha hikuái péicha oikuaa haguére Jesús gui osehã peteĩ pu’aka mbarete oipohanóva opavavépe (Lc. 6,19). Ha upévare oñeha’ã opoko imánto ruguaimínte jepe. Ojerovia péichante ojapóramo katuete okuerataha. Ha oipohano háicha heta hasýva rete, omosẽ avei ichugui kuéra umi espíritu pochy ha Aña kuru ojaitypóva ipy’ápe.

Umíva hatã osapukáiva rehegua hína. Jesús katu omosẽ ha omokirirĩ ichupekuéra. Kóva ko tembiapópe tuicha oipytyvõ Jesús pe umi
disípulokuéra, ha’e voi ohenói va’ekue iñirurã, ombo’e ha ojokuái haguã ichupekuéra. Ñande rehe avei niko ojere hetaichagua mba’asy ñande rete rehegua. Ha hetave Aña pochy ojaitypóva ñande rapicha kuéra korasõme. Omoingovaíva, ndohejáiva chupekuéra piro’y ha nome’ẽiva py’aguapy.

Mba’épa rehecha nde jerére che reindy ha nde che irũ. Mba’épa reñandu iñarõve ha tekotevẽve oñepohãno. Pe mba’asy nde retépepa térãpa umi pochy vai ndoje’óiva nde py’águi. Mba’etépa ejeruréta Jesús pe eñembojávo hendápe epoko haguã hese.

Pa’i Jasy.