Ñahendu Jesús. Jueves 6º Tiempo Durante el Año

Escucha el evangelio y la reflexión en: https://youtu.be/MCoX2YxjBzI

Jueves 6º Durante el Año Marcos 8, 27-33

Upérõ Jesús ha idisípulokuéra oho Cesaréa Filípope. Tapére Jesús oporandu chupekuéra: — Mavaha che piko pehendu oje’eha.
He’i chupe hikuái: — Oĩ he’íva nde rehe, nde Juan Bautistaha. Oĩ katu he’íva ndeha Elías, ha oĩ ave he’íva nde profetaha.

Jesús oporandu chupe kuéra: — Ha peẽiko mba’e peje, mávaiko che.

Pedro he’i chupe: — Nde hína pe Mesías.

Ha Jesús he’i idisípulokuérape ani haguã omombe’u avavépe. Jesús oñepyrũ omombe’u chupekuéra mba’épa ojehúta chupe. He’i, “Heta ahasa asýta hína. Umi mburuvicha, pa’ikuéra ha umi Moises léi ombo’éva ndoikuaase mo’ãi che hegui mba’eve. Che jukátarõ jepe
hikuái, aikove jeýta 3 ára haguépe”.

Omyesakã porã chupekuéra ko’ã mba’e. Upépe, Pedro ogueraha chupe ha’eñoháme, ha he’i chupe anive haguã péicha oñe’ẽ. Jesús katu ojere, oma’ẽ idisípulokuérare ha oja’o Pédrope: — Na che reja Sataná. Ndereikuaái pe Ñandejára oipotáva. Nde niko rejogua
opavavépe.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Oiméramo ñande rapicha hóga ha ifamília rayhúva, oñeha’ãva ikomunidáre, organisasión pe, itupao rayhúva, oñembo’etereíva, oguata comunidápe ha oikóva Biblia ipópe mba’e katu, ndofaltái lo mitã oñe’ẽ reity ha otalláva hese ohasakuévo.

Opaichagua ningo ñaime. Oime umi mombyrymi guive ha sapy’a py’ánte oñembo’éva, ha oime katu umi oñembojáva ko’ẽ ko’ẽre Ñandejára támbore, oguatáva ára ha pyhare hendive hapichakuéra ndive.

Umívape Jesús oikuaauka oguahẽtaha ára ojejopy ha ohasa asytaha ojerovia haguére hese. He’i ningo umívape oikeha tape po’ípe ha ohupi kuaa vaerãha kurusu ijapére.

Ñahendu mitã Pédrope ndogustapái pe Jesús he’íva ha ojetyvyro ichugui. Ñande avei upéicha sapy’ánte ñande pochy ha ñañemborretovádo Kirito renondépe, ñañandu vove ipohýi etereimaha ñande apére pe ñande júgo. Ha Jesús omongavaju Pédrope. Oityvyro imi chupe. Ha upévo oikuaauka ñandéve avei che reindy ha nde che irũ, jahasa asykuaa vaerãha Ñandejára ha ñande rapicha
rayhupápe, jaikuaa pype jajekóramo hese opa mba’e ikatuha jaropu’aka py’aguapýpe.

Pa’i Alberto Luna.