Ñahendu Jesús. Jueves V de Cuaresma

Escucha el evangelio y la reflexión en: https://youtu.be/XFg_qLjBlQc

Jueves 5º Cuaresma Juan 8, 51 – 59

Upérõ Jesús he’i: Añetéko ha’e peẽme, pe ojapóva umi mba’e che ha’éva nomano mo’ãi araka’eve.

Umi judíokuéra he’i chupe: — Ko’ágã katu roikuaa porã erekoha demóño nde pype.

Abraham ha opaite umi proféta niko omanomba vaekue, ha piko reju ere oréve: “Pe ojapóva che ha’éva nomano mo’ãi.” Nde nga’u piko nde tuichave ore ypykue Abrahámgui?

Ha’e niko ymáma omano ha umi proféta péichante avei. Máva piko nde.

Jesús he’i chupekuéra: — Chete voi añe’ẽ porã ramo che jehe, upéva ndovaléi mba’everã. Upe che moĩ porãva katu niko che ru, upe peẽ pejéva ha’eha peẽme Tupã. Ha peẽ ndapeikuaái chupe. Che katu aikuaa chupe, ha ha’érõ ndaikuaaiha chupe, peẽicha avei che japúta. Añetéko ha’e peẽme che aikuaaha chupe, ha ajapoha pe ha’e he’íva. Pende ypykue Abraham niko ovy’a vaekue ohecháta haguére che ajuha ára. Ha ohecha va’ekue ha’e, ha tuicha ovy’a.

Umi judíokuéra he’i Jesúspe: — Ne’ĩra niko remboty 50 áño, ha piko ere oréve rehecha hague Abrahámpe.

Jesús he’i chupekuéra: — Añetéko ha’e hína peẽme, che aikove Abraham oikove mboyve guive. Upépe ipojái joa hikuái itáre ojapi haguã Jesúspe. Ha’e katu okañy chuguikuéra ha osẽ tupaógui.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Oime niko he’íva: “Ñane resãi guive ñande retépe, opa mba’éma iporãmba”. Ha oime katu he’íva: “ko yvy ári ja’úva ha jarekóvante la ovaléva, uperiregua ndajaikuaái”. Ha upéicha heta ñande rapicha oime hi’ãhóva ha ojesarekóva ombyaty haguã heta mba’e ko yvy ári, oheka vy’a ikatu aja ojuhu. Oisyryku pe hekovemi ohupyty peve ichupe noiméi ramo guáicha tekove uperiregua. Noha’arõi voi mba’eve iporãva omano rire.

Jesús katu he’i: “pe ojapóva che ha’éva nomano mo’ãi araka’eve”. Upéicha oikuaauka ñandéve ñande rekove ndaha’éiha ko yvy ári guarãnte. Oñembojoapyha ñandéve tekove opave’ỹva, oñepyrũva ko’ãga ha oñemohu’ãva Ñandejára ykére ñamano rire.

Upéva pe tekove añete, pe tekove opave’ỹva ha’e hina Tupã remime’ẽ, oñepyrũ hína ko’ãga ha upéi oñemosã yvágape. Jesús he’i ha’e orekoha upéva, oikuaa rupi Tupãme ha ou rupi ichugui. Ha Jesús ome’ẽse ñandéve avei pe tekove añete Ñandejáragui oúva. Ha mba’etekópa che irũ ha nde che reindy, oime hína nde py’ápe pe jerovia ñande rekove uperiregua rehe.

Mba’épa reñandu. Oimépa opávo nde hegui ko nde rekovemi eguéta ha nanderapykuere mo’ãi. Térapã eha’arõ ko nde rekove ko’ãgagua Jesús pu’aka rupive oñembojoapy tekove pyahu ndive uperire Ñandejára ykére.

Pa’i Alberto Luna.