Ñahendu Jesús. Lunes 18º Durante el Año

Escucha el evangelio y la reflexión en:

Lunes 18º Durante el Año Mateo 14, 13 – 21

Upérõ ohendúvo Jesús upe Juánpe ojehu va’ekue, ojupi kanóape ha oho ha’eñoháme. Ojekuaávo moõpa oho, opavave osẽ oikohágui ha oho hapykuéri yvy rupi. Oguejývo Jesús pe kanóagui, ha ohechávo hetaha umi ijatýva, oiporiahuvereko chupekuéra, omonguera opa umi hasýva.

Pytũmarõ hína, idisípulokuéra ou hendápe, ha he’i chupe:— Pytũmbotáma niko hína, ha árupi ndaipóri avave oikóva. Emondómana opavavépe toho toheka upérupi ho’u va’erã.

Jesús katu he’i chupekuéra: — Maerãiko ohóta. Peẽ voi peme’ẽ chupe kuéra ho’u va’erã. Ha’e kuéra katu he’i chupe: — Michĩ eterei niko pe jarekóva, 5 pan ha mokõi piránte.

Jesús he’i chupekuéra: — Peru chéve ko’ápe. Ha omboguapy opavavépe pe kapi’ipépe. Upéi katu ohupi ipópe umi 5 pan ha mokõi
pira, oma’ẽ yvágare ha ojerure Ñandejárape ohovasa haguã. Upéi oipehe’ã umi pan ha ome’ẽ idisípulo kuérape, ha ha’e kuéra ome’ẽ opavavetépe. Opavave ho’u hyvatã meve.

Ha pe hembyrégui ombyaty hikuái 12 ajaka renyhẽ. Umi okaru va’ekue niko 5.000 rupi, ojeipapa’ỹre kuña ha mitã.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Opa hendaguio niko oñembyaty oúva mísa hápe, ha ojotopántema pe tupaópe. Ñasẽ ñande rógagui ha opavave jagueru ñane ñembo’e ñane mba’e jerure, térã ikatu jaha avei mísa hápe ja’agradese haguã Ñandejárape ome’ẽ haguére ñandéve jajerure va’ekue ñane embo’épe. Oime avei oúva oñembo’e haguã ihénte kuéra omanóva rehe.

Pe ñande aty háicha tupaópe heta hendáguio jajúva, upéicha avei ijaty raka’e heta oúva oheka Jesús pe. Ha umíva péicha ojapo oikotevẽgui hese. Oime oñepohanoséva, oime ohenduséva iñe’ẽ, oime oipotáva Jesús ohovasa ichupe, oime avei ipy’a rasýva ha ohekáva py’aguapy ha consuelo. Ha Jesús oiporiahuvereko ichupekuéra, omonguerá opa hasývape ha mba’e. Ha ohechakuaa ipahápe ndaha’éi ñepohano ha consuelo añónte oikotevẽva. Iñembyahýi avei hikuái.

Upe jave, oheja rangue oho peteĩ teĩ ojeheka ikatu háicha, ha’e ojerure apóstolkuérape omboja’o haguã opavave ndive pe oguerekomíva. Ha ohupívo ipópe pe pan, ojesaupi Ñandejára gotyo, ohovasa haguã. Péva ñanemomandu’a, ajépa, pe Pa’i ojapóva mísa hápe, Jesús ojapo haguéicha. Ha pe pan ja’úva ha Ñandejáragui oguejýva niko oñeme’ẽ opavavépe, ñanderupytypa haguã. Péva hína pe Jesús ojapo vaekue, ha péva he’ise avei hína pe mísa hápe jajapóva.

Ñakomulgávo misahápe ja’u hína pe pan Jesús ohovasa vaekue, oñemboja’óva ha oñeme’ẽ ñandéve opavavépe guarã. Upégui ñasẽvo -che reindy ha nde che irũ ñamboja’o kuaave haguã pe jarekomíva ñande rapicha ndive.

Pa’i Alberto Luna.