Ñahendu Jesús. Lunes V de Cuaresma

Escucha el evangelio y la reflexión en: https://youtu.be/ldu-qeT3mRI

Lunes 5º Cuaresma Ciclo C Juan 8, 12 – 20

Upérõ Jesús oñepyrũ jey oñe’ẽ, ha he’i: — Che niko hína pe ohesapéva opavave rekove ko yvy ári. Upe che moirũva ndoiko véima pytũmbýpe. Che ahesapéta hekove ha ha’e oikovéta.

Umi fariséo he’i chupe: — Nde niko nde jehénte reñe’ẽ repyta porã haguã. Mba’everã ndovaléi upe eréva, ha nde japu.

Jesús katu he’i chupekuéra: — Nda’upéichai hína. Che jehénte añe’ẽrõ jepe, añeteguánte upe ha’éva. Che niko aikuaa moõguipa aju ha moõpa aha. Peẽ katu ndapeikuaái. Peẽ niko pemoĩ porã térã pemoĩ vai pende rapichápe opavave ojapoháicha.

Che katu avavére péicha ndajapói. Ha oimérõ ajapo, hekopete ajapo, ndaha’éigui che año upe ajapóva. Che Ru, che mbouhare oĩ che ndive. Pende léipe niko he’i: “Oĩ ramo mokõi he’íva ohecha hague peteĩ mba’e, upéva ovaleha.” Upévare, che voi añe’ẽ che jehe. Ha upéi che Ru, che mbouhare, avei oñe’ẽ che rehehápe.

Oporandu chupe hikuái: — Ha moõiko oime nde ru.

Jesús he’i chupekuéra: — Peẽ nda che kuaái, ha ndapeikuaái che rúpe. Chéve che kuaa rire, peikuaa vaerã mo’ã avei che rúpe.
Kóicha oñe’ẽ Jesús ombo’e jave tupaópe umi karameguã ofrénda ryru ypýpe, pláta tupaópe oñeme’ẽva oñeñongatuhápe.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Oguahẽ niko ára ñande rekovépe japytaha pytũmbyetépe. Ñakañy, ñande aho’i vy’a’ỹ, ndajaikuaái mba’épa jajapóta ha moõ gotyopa jajapíta. Upe jave jajuhuse omyesakãva ñandéve ñande rape. Ñahenduse ñe’ẽ omopu’ã jeýva ñande py’a oiméva yvýre. Jesús he’i umi hudíokuérape ha’eha pe ohesape ha ohechaukáva tekove añete rape. Iñe’ẽ rupi ñande resape, omyesakã umi mba’e japu pytũmbýpe ñande rekoséva ha ohechauka upe añeteguáva omyendýva py’aguapy ha vy’a ñande rekovépe.

Umi judíokuéra nohenduséi Jesús ñe’ẽ, he’i hese ijapuha. Irari chugui ha opytasénte ipórte tujápe. Ndoguerovaséi hekove ha ijepokuaaha. Oñandúpy hikuái ohendu ramo Jesús pe oguerova vaerãha hekove, ha upéva ndogustái chupekuéra.

Opytasevénte oiko pytũmbýpe, omo’ã mo’ã hekove, osẽ’ỹre hesakã háme. Ikatúko ñande avei jakyhyje Ñandejáragui, oike pypuku eterei ramo guarã ñande rekovépe. Okápente topyta, pepevénte. Ikatu ndajaipotái hína ohesapepa ñañongatúva tupa guýpe ha ñane rakate’ỹ ñande javoráire. Mba’etépa hína che irũ ha nde che reindy, umi mba’e iñypytũva nde rekovépe ha reikotevẽva Jesús ohesape ha oñemyesakã ndéve.

Pa’i Alberto Luna.