Ñahendu Jesús. Domingo 13º Durante el Año

Escucha el evangelio y la reflexión en: https://youtu.be/qT7Zg78zDUs

Domingo 13º Durante el Año Ciclo C. Lucas 9, 51 – 62

Oñemo’aguĩvo ára Jesús ojehupi haguã yvágape, osẽ oho Jerusalénpe. Omondo henonderã oho vaerãva ohecha chupe hendaguã Samariape. Umi Samariagua katu ndoipotái Jesúspe ijapytépekuéra, oikuaágui hikuái ohoha hína Jerusalénpe. Santiágo ha Juan oikuaávo upéva, osẽ he’i chupe: — Mbo’ehára, eipotápa roñembo’e Ñandejárape, ha toity ha’e tata yvágagui ohundipa haguã ko’ãvape.
Jesús katu ojere omongavaju chupe kuéra. Ha osẽ oho hikuái ambue puéblope.

Jesús ha umi hendive oĩva oguata jave ohóvo, osẽ peteĩ he’i Jesúspe:— Aháne nendive mamo rehohápe.

Ha Jesús he’i chupe:— Aguara’i niko oguereko ikeha, ha guyra kuéra hupa. Che katu ndarekói mamo ambojeko haguã che akã.

Upéi Jesús he’i ambuépe: — Eju che ndive.

Ha’e katu he’i: — Che ra’arõna tañotỹ raẽ che ru, ha upéi taju.

Jesús katu he’i upévape: — Eheja omanóva toñotỹ omanóvape. Nde tereho emyerakuã Ñandejára Rréino.

Oĩ katu he’iva Jesúspe: — Mbo’ehára, che niko ahase nendive. Che ra’arõna taha raẽ tamombe’u che rogaguápe, ha upéi taju nendive.
Jesús he’i chupe: — Arádo omoĩva ipópe ha oma’ẽ mantéva hapykuévo, péva na’iporãi Ñandejára Rréino peguarã.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Jajapose ningo pe Ñandejára rembipota ha ñame’ẽse avei gústo ñande júpe. Jaguatase Jesús ndive ha jaikose avei ñane akãre. Ñambopyahuse ñande rekove ha nañasẽséi ñande jepokuaa hágui.

Jahecha ko’ápe Jesús ojedesidi ha oguata ohóvo Jerusalén gotyo, oikuaa porã ramo jepe upépe ijetu’u ha ohasa asytaha. Hapykuéri oho apóstolkuéra. Ijetu’u hína la korrída hendive kuéra, hendy kavaju resa. Péicha ramo jepe ndopoíri chugui hikuái. Oho hendive.

Ha péichako hína che irũ ha che reindy. Jesús ñanerenóiramo oguahẽ ára, jaheja va’erãha la jahejáva ha jaha hendive, toiko la oikóvape. Ndaipóri chera’arõmína térã aháta aju.

Oguahẽ ára ndaikatuveiha japytánte ñama’ẽ kora ári guive. Jaike va’erãha korápe ñahenonde’a tóro ñarõ. Ha umi samaritanokuéra omboty haguéicha Jesús pe hokẽnguéra, oĩta avei ombotýva ñande rováre okẽ ha ndoikuaaséiva mba’eve ñande hegui, ha oĩta ave ouséva ñane ndive ha ñanemoirũséva.

ÑAÑEMBO’E OÑONDIVE

Ñandejára Jesucristo, aníkena eheja kyhyjégui rombopo’i ha roguevi. Ore renói katu ha oremokyre’ỹ rojepoi paite haguã tapépe nendive ha ore irũnguéra ndive. Amén.

Pa’i Alberto Luna.