Ñahendu Jesús. Martes 7º Tiempo Durante el Año

Escucha el evangelio y la reflexión en: https://youtu.be/51QUwyyy8xo

Martes 7º Durante el Año San Marcos 9, 30-37

Jesús ha idisípulokuéra osẽ oho Galiléa jerére. Ha Jesús katu ndoipotái avave oikuaa ha’e oikoha upe rupi, ombo’égui oikóvo idisípulokuérape.

He’i chupekuéra: — Umi che rehe ija’e’ỹva niko che reitýta hína ha che jukáta hikuái. Ha amano hague 3 ára hápe katu,
aikove jeýta.

Idisípulo kuéra katu ndoikuaái mba’épa pe Jesús he’íva chupe kuéra. Ha okyhyjégui, noporandúi chupe hikuái.

Jesús ha idisípulo kuéra oguãhẽ Cafarnaúmpe. Ha oĩ jave hína hikuái Pedro rógape, Jesús oporandu chupe kuéra: — Mba’e rehe piko peñemongeta kyre’ỹ pejúvo tapére.

Ha’ekuéra katu okirirĩmba chugui. Oñe’ẽ niko oúvo ra’e hikuái mávapa pe tuichavétava ijapytépekuéra. Ha Jesús oguapy, ha ohenói umi 12pe. He’i chupekuéra: — Oĩrõ pende apytépe oñemoĩséva hapichakuéra ári, péva tapykuetépe oñemoĩ va’erã, ha oiko va’erã hapichakuéra rembiguái ramo.

Upéi ohenói peteĩ mitã ha omoñembo’y ijapytépekuéra. Omboguapy hapypa’ũme ha he’i chupekuéra: — Peẽ peguerohory ramo mitã ko’ãichagua, chéve che guerohory hína. Ha chéve che guerohorýva, nda chéve añói che guerohory, upe che mbouharépe ave.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Nañahenduséigui problema niko ñañembotavynte ha ñambohasa. Umi apóstolkuéra avei ohendúvo Jesús he’iha ohasa asy ha omanotaha, nahesakãi ichupe kuéra, ha okyhyje ave oporandu haguã. Ndoikeséi karaguatatýpe hikuái. Máva piko oime oikeséva, ajépa. Ha uperiremínte oikovaíma katu oñondive hikuái, jahecha mávapa mba’e guasuve, mávapa la omandáva ijapytépe kuéra hamba’e. Ojopi ichupe kuéra pe chentese mba’asy.

Chénte aikuaa, che ha’éva oiko va’erã, che ajapo va’erã ajaposéva, ha umícha. Ha Jesús ome’ẽ ichupekuéra pe mba’asy pohã. He’i: “Pe oñemomba’e guasuséva oiko va’erã tapykuegua ha opavave rembiguái ramo”. Ha upépe ohupi ha oañua peteĩ mitãme. Ohechauka jahayhu va’erãha umi ikangyvéva ha imboriahúva ñande apytépe jakueraséramo jejapo mba’asýgui.

Umi oikotevẽva hína umi ñane pohãnótava. Ha avei he’i Jesús hese jajapoha hese umi mba’e jajapóva ñande rapicha michĩvéva rehe. Ha péicha ikatu jakuera jahávo, ha mbeguekatúpe jaiko rangue Aña ra’y térã Aña rajy, oiko ohóvo ñande hegui Ñandejára ra’y ha Ñandejára rajy.

Pa’i Alberto Luna.