Ñahendu Jesús. Miércoles 11º Durante el Año

Escucha el evangelio y la reflexión en: https://youtu.be/ik7AMnPsTB8

Miércoles 11º Durante el Año Mateo 6, 1-6. 16-18

Upérõ Jesús he’i idisípulokuérape: Pejapo ramo oimeraẽ mba’e pemomba’e guasu haguã Ñandejárape, ani pejapótei opavave rovake pejechauka haguã. Péicha pejapórõ, pende Ru yvagapegua nomyengovia mo’ãi peẽme mba’eve.

Pévare, peipytyvõrõ oikotevẽvape, ani pemyerakuã opa rupi ojapoháicha umi hova mokõiva, tupaópe térã okápe. Ha’ekuéra niko péicha ojapo oñeñe’ẽ porã haguãnte hesekuéra. Añete ha’e peẽme, chupekuéra niko oñemyengoviapáma voi pe oñemyengovia va’erã.

Peipytyvõ ramo oikotevẽvape, ani peheja oikuaa pende rapicha pehayhuvévante jepe. Kirirĩhámente pejapo. Ha péicha, pende Ru ohecháva upe kirirĩháme pejapóva, omyengoviáta peẽme pene rembiapokue. Peñembo’e jave, ani peñembo’e umi hova mokõivaicha.

Umíva niko oñembo’y joa oñembo’e haguã, taha’e tupaópe térã umi okáre, ojehechauka haguãnte opavavépe. Añete ha’e peẽme, chupekuéra niko oñemyengoviapáma pe oñemyengovia va’erã. Peñembo’éta vove katu, peike pende kotýpe, pemboty pene rokẽ, ha pene año peñembo’e pende Rúpe. Ha pende Ru ohecháva mba’épa pejapo pene añoháme, omyengoviáta peẽme pene rembiapokue.

Pe’ajuna ramo Ñandejárape pemomba’e guasu haguã, ani peñembohovasy gua’u umi hova mokõivaicha. Umíva niko péicha ojapo ohechauka haguãnte o’ajunaha hína. Añete ha’e peẽme, chupe kuéra niko oñemyengoviapáma voi pe oñemyengovia va’erã.

Pe’ajuna jave katu, pejovahéi ha peñakãkarãi, ani haguã avave ohecha kuaa pe’ajunaha hína. Nde Ru añónte ohecháta pe ne añoháme rejapóva. Ha’e ohecha kuaáta ndéve ha omyengoviáta ndéve ne rembiapokue.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Pe ryguasu ombo’apa ramóvaicha osẽva okokore ha ndopavéi, oime avei ñande rapicha ojechaukasemíva. Ojapóvante omoherakuã, onohẽ fóto, ohupíma katu féivupe. Oime avei umi ojupi vove y oraháva donación Bañado pe osẽ haguã télepe, diário pe ma katu, ha umícha. Oime avei ohóva tupaópe fiesta patronal ajánte.

Oho oñesũ altárpe, ohupi ha omboguata la sánto, osẽ haguã fótope upéi. Ndaha’éi ohayhúgui hapicha mboriahu, térã ojeroviágui Ñandejára ha Tupãsýre. Nahániri. Ohónte ojechauka haguã ha opyta porã haguã hénte renondépe ha péicha hágui ramo guarã Ñandejára ave ohovasa haguã ichupe.\

Jesús he’i ñandénte jaikuaa va’erã upe jajapóva Ñandejárape guarã ha ñaipytyvõ haguã ñande rapichápe. Upépe ningo, che reindy ha nde che irũ, ojekuaa añete mba’épa jaheka.

Ñamomba’e guasusépa Ñandejárape ñande py’aite guive, térãpa jaiporu ichupe ñañemomba’e guasu haguã ñande jupe. Ñaipytyvõsépa ñande rapichápe térãpa jaje’aposénte oñeñe’ẽ porã haguã ñande rehe. Mba’eichaitépa ikatúne kóva emboguejy nde rekovépe, nde rogapýpe ha umi reiko hárupi.

Pa’i Alberto Luna.