Ñahendu Jesús. Miércoles 2º Adviento

Escucha el evangelio y la reflexión en: https://youtu.be/c1eaQBgn3_c

Miércoles 2° de Adviento Mateo 11, 28 – 30

Upérõ Jesús oñe’ẽ ha he’i: “Peju che rendápe opa peẽ pene kane’õ ha pemba’apo pohýiva, ha che ndive pepytu’úta. Peheja tamoĩ pende apére che júgo, ha pejapo che ha’éva peẽme. Ha peikuaáta che py’a porãha ha ndajejapoiha, ha che ndive pejuhútapytu’u. Pe júgo amoĩ tava pende apére niko ivevúita peẽme, ha ndaipohýi mo’ãi upeaipotáva peraha”.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Ñanemandu’a oguahẽvove umi ára ñane kane’õ ha jahasa asyha, jajepokãhaÑandejárare ha ñande rapicháre ñanepytỹvomi ha ñanembovevúi haguã upe ñandejopývagui. Jajeplagueámi ha jajahéi ñande rekovére umícha jave. Nañanerendái.Ja’e voi katu: Che kuérai, amombopase opa mba’e ha aha mombyry ko’águi mba’e.

Mba’ére piko Ñandejára chéve péicha chekastiga. Mba’e mba’éiko ajapo vaiete ra’e. Ha sapy’ánteko ñaimo’ã hágui hína ñandénteha ñaime vaíva, jaha jajuhu ojejopyvéva ñande hegui. Oiko asyvéva, imboriahuvéva ha ombohasáva py’aguapýpe.

Nahasẽngýiva ñandéicha. Mba’épa oiméne ombovevúiva ñande rapicha ojejopývape.

Jesús he’i: “Peju che rendápe opavave peẽ pene kane’õ ha peiko asýva, ha che ndive pepytu’úta”.

Jesús niko nde’íre oipe’átaha ñande ape árigui mba’éve. Upéva rangue katu he’i: “Pe júgo amoĩtava pende apére niko ivevúita peẽme, ha ndaipohýi mo’ãi upe aipotáva peraha”. Aipo ramo niko pe Jesús ñepytyvõ ndaha’éi je’u rei ha jeiko piro’y ñeha’ã’ỹre.

Ha’e ñanemombarete ha ñanembopy’a guasu jaropu’aka ha ñahenonde’a haguã opaichagua tembiapo pohýi, opaichagua jejopy vai ha mba’asy vai jepe ra’e ñande py’a mano’ỹre, jajerovia pype ha’e oimeha ñande ykére ha nañanderejarei mo’ãiha mba’eveichavérõ.

Mba’etekópa che irũ ha nde che reindy. Ejeroviápa nde Jesús nembopyapy ha nemombaretetaha ehasa haguã heta mba’e vai pa’ũ rupi. Nde reity’ỹre yvytu atã, nde rapy’ỹre tata piriri ha nde raha’ỹre raudal kakua ohasáva nde ykére. Jajesaupi aipóramo Jesús re jeroviapópe ha jajepokã hese oguahẽvove ára vai ñande rekovépe.

Pa’i Alberto Luna.