Ñahendu Jesús. Miércoles 3º Adviento

Escucha el evangelio y la reflexión en: https://youtu.be/7d9HqGXG05o

Miércoles 3° de Adviento Lucas 7, 19 – 23

Upérõ Juan Bautista disípulokuéra omombe’u Juánpe umi mba’e Jesús ojapóva.

Upémarõ, ohenói mokõime, ha omondo Jesús rendápe. Oho va’erã hikuái oporandu chupeha’épa añete hína pe Mesías ou va’erãva, térãpa oha’arõve va’erã hikuái. Juan Bautista disípulo oguãhẽ Jesús rendápe, ha he’i chupe: — Juan niko ore mbou ne rendápe roporandu haguã ndéve, ndépa hína pe Mesías, térãpa roha’arõve va’erã ambuépe.

Upe javete Jesús omonguera hína heta hasýva ha oiko asývape. Hetágui avei omosẽ demóño hamba’e, ha omonguera umi ohecha’ỹvape. Upéi katu ojere he’i chupekuéra: — Tapeho peje Juánpe mba’épa pehecha ha mba’épa pehendu.

Peje chupe: ohecha’ỹva ohecha jeyha, paralítiko oguata porãha, lepróso okueraha, ohendu’ỹva ohendu jeyha, omanóva oikove jeyha ha imboriahúva ohenduha Ñandejára Rréino marandu porã. Ha Tupã ohovasa vaerã umi ohechávape ko’ã mba’e ajapóva, ha nda che rejái.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

“Ndaikuaái ojehúva chéve cheko’ẽnte sapy’a che ygue ygue rei imposible ndavy’ái”, he’i ningo Emiliano purahéi. Ha péicha avei sapy’a ikatu ñañandu ñande ha ñapensa: “Pévante piko la ñande rekove, noiméi piko ojajái ha iporãve va’erã raka’e. Ha upe ñañandúva ñande rekovére ikatu avei ñañandu ñande rapicháre. Nañaha’arõi voi mba’e guasu osẽ umi ñandeichaguágui. Ni cinco nañame’ẽi ñande jeregua ha umi jaikuaa porãva rehe.

Upéva oiméne ombokuchu avei Juan Baustista akã ohechávo Jesus pe ha umi iñirũnguérape. Ha’e ningo oiméne oimo’ã raka’e Jesús, Tupã ra’y, outaha tuicha mimbipa reheve, hendy ha ojajaipátaha opavave renondépe. Ha ohechávo Jesús peteĩ ñandéicha guavanteha, oñepyrũma ipy’a mokõi ha oduda Jesús renondépe. Omondóma katu idisípulokuéra oporandu haguã ichupete voi ha’épa hina upe Tupã remimbou añete térãpa oime ambue tuichavéva ou va’erãva ha’e rire.

Jesús nde’íri ichupe kuéra mávapa ha’e. Nde’íri chéko la Mesias, chéko hína Tupã remimbou añeteguáva, nahániri. Jesús he’ínte omombe’u haguã Juan pe upe ha’ekuéra ohecháva ojapoha umi oiko asy, imboriahu ha oikotevẽvare. Mba’éichapa Jesús oñanduka
opavavépe iñe’ẽ ha hembiapo rupive upe Ñandejára mborayhu ha Ñandejára pu’aka.

Aníkena ndave che reindy ha nde che irũ, upéicha ehechase katuete Ñandejára omboguejývo yvága ne renondépe ha nderehechakuaái imba’e porãiteha nendive, hetaite mba’e ome’ẽ va’ekue ndéve, ome’ẽva hína ndéve ko’ãgaite voi ha ome’ẽvéta gueteri. Ha mba’éichapa ojevale heta nde rapicha ndeichaguáva rehe nde rovasa haguã.

Pa’i Jasy.