Ñahendu Jesús. Miércoles 7º Pascua

Escucha el evangelio y la reflexión en: https://youtu.be/8jsQrXxWWuk

Miércoles 7º PASCUA Juan 17, 1b. 11b-19

Upérõ, Jesús oñe’ẽ rire idisípulokuérape, omaña yvágare ha he’i: Che ru marangatu, eñangarekokena hesekuéra nde rérape, umi chéve reme’ẽ va’ekuépe, ha’ekuéra peteĩcha oiko haguã oñondive, nde ha che ñane peteĩháicha.

Hendivekuéra aime aja ko yvy ári niko, añangarekova’ekue hesekuéra nde rérape, nde reme’ẽ haguéicha chéve ajapo haguã. Ha avave ijapytéguikuéra noñehundíri. Oñehundi va’erã jepe niko kuri ku oñehundi vaerãvante voi, oiko haguã hekoitépe Ñandejára Ñe’ẽ.

Ko’ágã niko aha ne rendápe. Ha’e hína ko’ã mba’e ko yvy ári aime aja gueteri, ha’ekuéra henyhẽ haguã vy’águi, che avy’aháicha. Ahendukapáma chupekuéra ne ñe’ẽ, ha upévare umi nde rehe ojerovia’ỹva nda’ija’éi hesekuéra.

Che disípulokuéra niko ndaha’éi umi nde rehe ojerovia’ỹvaicha, ha che ave ndaha’éi. Ndajeruréi niko ndéve reipe’a haguã chupekuéra ko yvy árigui. Nahániri. Añáguinte eñangareko hesekuéra.

Che ndaha’éi ko yvy arigua, ha ha’ekuéra avei ndaha’éi. Emomarangatu kena chupekuéra, ne ñe’ẽ añeteguáva rupi. Nde che mbou haguéicha yvypórakuéra apytépe ko yvy ári, péicha avei che amondo chupekuéra yvypórakuéra apytépe. Hesekuéra rehehápe niko che añeme’ẽmbaite va’ekue, ikatu haguãicha ha’ekuéra avei oñeme’ẽ ne ñe’ẽ añeteguáva rupi.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Túva ha sy oñangareko ha ohekombo’e imemby, mbo’ehára ombo’e mitãnguérape, catequista ombo’e Ñandejára ñe’ẽ mitãkuña ha mitãkuimba’épe. Oime aja hendive kuéra ohecha, omoirũ ha oisãmbyhy iñe’ẽ ha hembiapo rupi.

Oguahẽne ára ndaikatuveiha omoirũ ha oĩ hendive kuéra, ha pe ombo’e va’ekue opyta rei vaicha. Mitãnguéra okakuaa, osẽ ógagui, omohu’ã escuela, catequesis. Oguahẽ ára ojei vaerãha ojuehegui ha imbo’e harégui.

Jesús avei ojei ijapóstolkuéragui. Omano rire ha’e kuéra opyta hese’ỹ ha pe Jesús ombo’e va’ekue ndopyta reíri, opyta ipype kuéra, omba’apo ipype ijehegui. Pe semilla okakuaa háicha ijehegui, umi ñe’ẽ porã ñambohasáva ñande rapichápe ha tembiapo porã jahechaukava’ekue, opyta ipype. Ndopa reíri, noñehundíri. Ágã itiémpope heñoi, okakuaáne ha hi’a.

Jesús ojerovia Ñandejára omongakuaataha umi ñe’ẽ ha’e oheja vaekue ijapóstolkuérape. Ojerovia Ñandejára oñangarekotaha hesekuéra ipore’ỹme. Ha avei ojerovia ijapóstolkuéra imba’e porãha ha oñeha’ãtaha ojapo umi ha’e ombo’e va’ekue ichupekuéra.

Ñañeha’ã che reindy ha nde che irũ jaheja umi semílla porã ñane ñe’ẽ ha ñane rembiapo rupive. Ágã upéi ñande nañaimevéi ramo jepe, pe Ñandejára ñe’ẽ omba’apo ijehegui ha opyta pypuku ñande rapicha py’ápe, omyesakã hape ani haguã okañy.

Pa’i Alberto Luna.