Ñahendu Jesús. Ñandejára jehechauka. Epifanía

Escucha el evangelio y la reflexión en: https://youtu.be/PKJ2JTd7pSE

Ñandejára jehechauka. Epifanía. Mateo 2, 1 – 12

   Jesús niko onase vaekue Belénpe, Judéape. Herodes va’ekue rréi upérõ. Oguãhẽ katu Jerusalénpe, kuarahy resẽ guio oúvo, mbohapy karai arandu. Oguãhẽmba riremínte oporandu hikuái upépe:

— Moõiko oime pe mitã onase vaekue hudío kuéra rréirã. Rohecha niko kuarahy resẽme mbyja chupe omohenondéva. Ha roju hína romomba’e guasu haguã chupe.

   Herodes oikuaávo upéva ipy’a tarovaite. Ha opa Jerusalengua upéichante avei. Upémarõ, Herodes ombyatypa ijerére pa’i ruvicha kuéra, ha umi hudío kuéra léi ombo’éva. Ha oporandu chupe kuéra moõpa onase vaerã ra’e pe Mesías. Ha’e kuéra he’i chupe: — Belénpe, Judéape. Proféta niko oheja vaekue kuatiápe he’i ramo guare kóicha:

“Ha nde Belén reiméva Judápe, nane michĩvéi mba’eveichave ramo puéblokuéra apytépe upe tetãme.

Ndehegui osẽta rréi oisãmbyhýtava che retã Israel.”

 Upépe, Herodes ohenoika kañyháme umi karai arandúpe. Ha oporandu chupe kuéra araka’etépa ohecha ra’e hikuái pe mbyja. Upéi katu omondo chupekuéra Belénpe, he’ívo: — Tapeho peikuaa porã moõpa oĩ hína pe mitã. Pejuhu rire, peju pemombe’u chéve. Che ave ahase amomba’e guasu chupe.

   Herodes oñe’ẽmba riremi, umi karai arandu osẽ oho. Ha pe mbyja ha’ekuéra ohecha va’ekue kuarahy resẽvo, oho henonderã. Upéi katu opyta pe óga pe mitã oĩha ári.

Umi karai arandu ohechávo moõpa opyta pe mbyja tuicha ovy’a. Oike hikuái pe ógape, ha upépe ohecha pe mitãmi, isy María ndive. Oñesũ ha omomba’e guasu chupe hikuái. Upéi katu oguenohẽ ikarameguãgui óro, insiénso ha mírra ryakuã porã, ha ome’ẽ chupe. Ñandejára he’i rire chupekuéra iképe ani haguã oho Herodes rendápe, osẽ oho hikuái hetãme ambue tape rupi.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Oiméne mitãnguéra ijayvu joa cállere ohechauka ojupe mba’épa ogueru los reyes, ha umíva pa’ũme oime ndorekóiva mba’eve, isy ha itúva ndohupytýigui ojogua haguã chupekuéra. Hetáma voi ningo oĩ la gásto ko Navida ha áño pyahúre, ha los reyes árape ñaguahẽvo katu ipo’íma la pióla, hetápe ndohupytyvéima oipotáramo jepe.

Ñahendu purahéipe oñembyasy upe mitã hesaráigui chugui los reyes, ha ojerure asy isýpe: “comprámena mamíta aipotánteko che ave”. Heta py’áre opoko kóva ko purahéi ha oime ojapóva campaña ombyaty haguã mitãnguéra peguarã regalo ha upéi omoguahẽva chupe kuéra.

Mba’épa amo hapópe ñanembo’e ko’ã karai arandu mombyrýgui oúva? Ñande niko ñama’ẽterei pe regalo Jesús pe oguerúvante. Pe tuichave mba’e ñanembo’éva hikuái hina jaheka Jesús pe, ñañemoĩ tapépe ipuku ramo jepe, jajuhu peve. Pe tuichave jopói niko ndaha’éi lo rréye oguerúva, pe tuichave mba’e niko pe Tupãsy ha San José ohechaukáva chupekuéra. Jaikuaa Jesús pe, ñañandu chupe ñande rekovépe, jajesareko hese, upéva ha’e pe regalo tuichavéva ikatúva jahupyty ha ñame’ẽ.

Pa’i Jasy.