Ñahendu Jesús Ñe’ẽ. Apóstolkuéra Simón ha Judas

Escucha el evangelio y la reflexión en: https://youtu.be/83CjcGK62sQ

28 octubre: Apóstolkuéra Simón ha Judas Lucas 6, 12 – 19

Umíva umi árape, Jesús ojupi peteĩ sérro ru’ãme oñembo’e haguã. Ha pyhare pukukue opyta upépe. Ko’ẽ rire ohenói umi idisípulope hendápe, ha oiporavo 12. Umívape ohenói apóstol.

Umíva hína: Simón, Jesús ombohéra va’ekue avei Pedro, ha tyvýra Andrés. Upéi oĩ Santiágo, Juan, Felipe, Bartolomé, Mateo, Tomás, ha Santiágo, Alféo ra’y. Avei Simón, Selóte oje’eha, Judas, Santiágo ra’y; ha ipahápe Judas Iscariote, ku upéi otraisiona vaekue Jesúspe.

Jesús oguejy idisípulokuéra ndive pe sérrogui, ha opyta hikuái ñúme. Oñembyatypa ra’e upépe umi hapykuéri oikóva. Heta avei oĩ oúva Judéagui, Jerusalén, Tíro ha Sidóngui. Ou ra’e hikuái ohendúvo Jesúspe, omonguera
haguã chupekuéra imba’asýgui. Umi demóño po guýpe oikóva okuerapánte avei.

Maymávante opokose Jesús rehe, oikuaágui pe pu’aka osẽva chugui omonguerataha chupekuéra.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Oime niko ñande apytépe heta tapicha katupyry, oikóva ojapo hembiapo kirirĩ hápe, imba’e porãva, ojeroviáva ha oipytyvõ hapichápe. Oime oñembo’éva, jahecháva tupaópe, organización pe hamba’e, ideprovéchova hapichápe. Ha ndaha’éi la ojekuaa guasúva, hyapúva, osẽva diario pe, térã odiskurseáva, oñe’ẽva radio ha télepe ha mba’e.

Apóstolkuéra apytépe niko oime kuri mokõi Simón. Peteĩvape Hesu ombohéra va’ekue Pedro, he’iséva ita. Péva la ñande jaikuaavéva hína, Jesús ohejágui ichupe omyakã haguã pe Iglesia iñepyrũmbýpe. Ha upéi oime hína Simón Selóte.

Umi selóte ningo ha’e va’ekue gerrillero oñorairõva omosẽ haguã mbaretépe romanokuéra tetã Israélgui. Ha Jesús ohenói raka’e Simónpe ojeheja haguã kyse ha lánsagui, ha oñemoĩ haguã ijykére Ñandejára Reino oheka ha omoherakuã haguã py’aguapýpe.

Oime va’ekue avei mokõi Judas Jesús ohenói va’ekue iñirũra. Peteĩva hína Judas Iscariote, pe plátare oity va’ekue Jesús pe umi mburuvicha pópe. Upéva ñande jaikuaa hína ha ñanemandu’a hese otraisiona haguére imaéstrope. Ha upéi katu oime Judas
Santiago ra’y, péva sa’ive ñande jaikuaa ha ndahyapu guasúi.

Ko árape niko ñanemandu’a hína Simón Selóte ha Judas Santiago ra’y rehe. Umi mokõi Jesús ohenói vaekue iñirũra ha naherakuã guasúiva, itapykue vaicha umi apóstolkuéra apytépe.

Upévare jepe nde’iséi hína ndojevaleiha hese kuéra Ñandejára. Ha pe comunidad oikotevẽ opaichaguáva rehe. Ndaha’éi umi ojekuaavéva rehente. Ha upéicha hína che reindy ha nde che irũ, natekotevẽi ñande famoso, ha opavave ñaneguerochichĩ ha ñandekuaa.

Upe he’iséva hína Jesús ñanerenói jaguata haguã hendive ha ñañomoirũ haguã jerovia ha tembiapo porãme ñande rapicha ndive.

Pa’i Alberto Luna.