Ñahendu Jesús Ñe’ẽ. Domingo 1º Adviento

Escucha el evangelio y la reflexión en: https://youtu.be/3JtwUCRVLSY

DOMINGO 1º Adviento Ciclo A Mateo 24, 37 – 44

Upéro Jesús he’i idisípulokuérape: Ojehu haguéicha umi árape Noé oikove ramo yvy ári, upéicha ojehu vaerã avei che aju jeyha ára. Umi árape ama guasu mboyve, opavave oiko vaekue okaru, omboy’u ha ñemendápe, Noé oike peve pe kanóa guasúpe. Ha upéi oimo’ã’ỹhágui, ou pe ama guasu ha ohundipa opavavépe.

Péichata avei che aju jey vove. Upéva upe árape, mokõi kuimba’e oĩta hína oñondive ñúme, peteĩ ojereraháta ha pe ambue katu ojehejáta. Mokõi kuña oñembisóta hína, peteĩ ojereraháta ha pe ambue katu ojehejáta.

Pejesarekóke aipo ramo, ndapeikuaái hína araka’etépa oúta pende Jára. Perekóke kóva pene akãme: Peteĩ óga jára oikuaa ramo araka’etépa oikéta hógape mondaha, ha’e ndoke mo’ãi ha ndoheja mo’ãi avavépe oike hógape omonda haguã chupe. Upévare, peẽ
avei pejesareko va’erã. Peimo’ã’ỹve jave niko che aju jeýta.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE

La arhel ndahi’órai. He’i ningo ñe’ẽ. Ha péicha ha’ete ku he’íva ñandéve Jesús, imandu’ávo Noe kásore. Oúramo guare pe y okakuaa ha ojaho’ipa ko yvy ape ha ojahogapa umi ndojupi jepéiva pe Noe várkope.

Upéicha avei he’i Jesús, jaikuaáramo mondaha ouseha oike ñande rógape. Ndajake mo’ãi hína. Japeskáta hese ani haguã ou jake aja ha ñanemonandi. Ha upéichata hína avei poloméno upe Ñandejára jeju ñande rekovépe. Péa ndahi’órai he’i Jesús. Ñaimo’ã’ỹve jave oúta. Anínteke ñande juhu jake hína. Ha ndaha’éiko katuete pe ára ñamanoha upe Ñandejára oúva ñane rendápe.

Péva mboyve ko heta vése ha’e ou ñane atõi ha oñeñanduka ñandéve ani haguã ñande resarái ichugui. Ikatúko jahupyty rupi mba’e porã ñande rekovépe, jahechakuaa Ñandejára oimeha ñane ndive, ñande rovasa ha ome’ẽha ñandéve igrásia. Ha ikatu avei jehasa asy rupi,
mba’asy, tekotevẽ rupi, ñañandu ñaikotevẽha hese.

Upépe ñahenói ichupe ha ñañembo’e, jaheka ichupe ha jajeporeka hese. Tañanepytyvõ ha toma’ẽmi ñande rehe. Ñane esperanza hese.
Rehechakuaápa che reindy ha nde che irũ, mba’éichapa Ñandejára ou oikóvo ne rendápe ha oñeñanduka ndéve. Ha’e ko nemoirũse opa araite ha oreko ndéve guarã heta mba’e porã. Eñatendékena ha’e oñeñanduka vove ndéve. Ani eke, eipe’a ichupe nde rekove rokẽ, ani ejavy pe gracis orekóva ha ome’ẽséva ndéve.

ÑAÑEMBO’E OÑONDIVE

Ñandejára Jesucristo, epoko míkena ore korasõre ha ore resape’a, roñandu, rojesareko ha rojapysaka haguã nde rehe, resẽva ore rapépe ha rejúva ore moirũ ha ore pytyvõ. Aníkena eheja romboty nde hegui ore róga rokẽ ha ore rekove. Amén.

Pa’i Jasy.