Ñahendu Jesús Ñe’ẽ. Domingo 31º Durante el Año

Escucha el evangelio y la reflexión en: https://youtu.be/9-D9-sS_FHc

Domingo 31 Durante el Año Ciclo C Lucas 19, 1-10

Upérõ Jesús og̃uahẽ Jericópe, ha ohasa ohóvo pe puéblo rupi. Upépe oiko peteĩ kuimba’e irríkova hérava Zaqueo. Ha’e niko hína umi impuésto okovráva ruvicha. Zaqueo niko ohechase Jesúspe. Ha ndaikatúi ohecha chupe, hetágui umi hénte Jesús jerére oĩva, ha upéi ave, Zaqueo ikarape voi. Odipara upémarõ Jesús renonderã ha oho ojupi peteĩ yvyra mátare.

Upégui ohecháta hína Jesúspe ohasávo upe rupi. Ha ohasávo ohóvo Jesús, omaña yvatévo ha he’i Zaquéope: — Zaqueo, nde pya’e eguejy upégui. Nde rógape apytase hína.

Pya’ete oguejy Zaqueo, ha torypápe omog̃uahẽ Jesúspe hógape. Ha umi hénte ohechávo upéva, oñepyrũ oñe’ẽ Jesús rehe. He’i hikuái, “Mba’éicha piko aipo ohóta opyta peteĩ pekador rógape.”

Okarupa rire, Zaqueo opu’ã ha he’i Jesúspe: — Opa arekóva amboja’óta mbyte rupi ha ame’ẽta hénte mboriahúpe. Ha oime rire che rapichápe ambotavy ra’e, amyengoviáta chupe 4 vése hetave.

Jesús he’i chupe: — Ko árape nde ha opa nde rogaygua pejesalva, ndégui hína Abraham ñemoñare añetete. Che niko aju aheka ha asalva hag̃ua opa umi oñehundítavape.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

“Ore ro’úva voínte la plata”, ñahendu he’i kuri peteĩ político. Továko oĩ ajúrare. Ajépa nde. Ha péicha umi corrupción pe oikóva ñane retãme ojavyky imba’e’ỹva rehe, ohakã trosa águio ha péguio, oipe’a ikatu háicha, proyecto, presupuesto ha hapichágui, ijupe ha isósio kuéra peguarã.

Ko karai Zaqueo angete ñahendúva niko ndaha’éi raka’e avei pohã ro’ysã. Zaqueo voi ningo la héra. Ha’e ningo impuesto kovraha ruvicha ha la ipuésto rupi opo’ẽva oikóvo hapicha bolsillo pe raka’e. Ha oikuaa porã ningo mitã Zaqueo la hembiapokue ha oñandúne raka’e huguái pohyiha, ha tekotevẽha oñembovevúi ha oñepohano ipy’aguapy haguã. Ha oikuaávo Jesús ohasataha ipuéblo rupi oiméne oñandu Ñandejára oipysoha ichupe ipo, osẽ haguã pe tujúgui. Ha ohóma voi katu mitã Zaqueo oheka Jesús pe.

Umi ohekáva Ñandejárape ipy’aite guive ojuhúta ichupe katuete. Jesús oipohanose avei umi irríkova monda ha corrupción ro’ópe ha upévare oho hógape. Ha Jesús renondépe Zaqueo ohechakuaa tekotevẽha omyengovia pe omonda va’ekue, omboja’o imba’e reta hembypáva ipy’aguapy haguã.

Ñande niko che irũ ha che reindy ãichagua tapicha renondépe ja’e jepi: Ko’ãva naipohãvéima, péicha guarãntema. Jesús katu ohechauka ñandéve ha’ekuéra ha’eha avei Ñandejára ra’y ha ikatuha avei ojesalva oipe’áramo ikorasõ hapicha mboriahúpe ha omboja’óramo pe orekóva oikotevẽva ndive.

ÑAÑEMBO’E OÑONDIVE

Ñandejára Jesucristo, nde niko nerekañýi umi nderekávagui ha ejúva embohasa oréve nde po orepe’a haguã pe tuju roimehágui. Ema’ẽ ore rehe ha ore pytyvõ rombopyahu haguã ore rekove. Amén.

Pa’i Jasy.