Ñahendu Jesús Ñe’ẽ. Domingo 33° Durante el Año

Escucha el evangelio y la reflexión en: https://youtu.be/MCfG9DmlWsE

Domingo 33 Durante el Año Ciclo C Lucas 21, 5-19

Upérõ Jesús ohendu mba’éichapa heta oĩ oguerohorýva pe tupao, ha opondera joáva opa umi mba’e oñeme’ẽ va’ekuére tupao oñembojegua hag̃ua.

Upépe Jesús he’i:— Og̃uahẽ vaerã ára ko’ã mba’e oñehundipávo. Ko’ãvagui ndopytái chéne peteĩ itánte jepe ojo’ári.
Idisípulokuéra oporandu chupe: — Mbo’ehára, araka’ete piko ojehúta upéva. Mba’éicha piko jaikuaáta og̃uahẽmaha upéva upe ára.

Jesús he’i chupekuéra: Cháke, aníke avave pene mbotavy. Heta va’erã ág̃a umi oúva che rérape. He’íne hikuái, “Chéko pe Mesías”, térã “Og̃uahẽma ára”. Ani mo’ãke peho umíva rapykuéri.

Pehendúne oikoha guyryry térã ñorãirõ opa rupi rei. Ani peñemondýi. Umíva umi mba’e niko ojehu va’erã voínte ára paha og̃uahẽ mboyve. Peteĩ tetã opu’ãne ambuére, ha opa rupi oñepu’ãmbáne ojuehe. Heta va’erã ág̃a yvyryrýi, ha oúne ñembyahýi ha mba’asy opa rupi. Yvágare pehecháne mba’e pehecha’ỹva, ha umíva tuicha penemondýine.

Opa ko’ã mba’e ojehu mboyve, oĩ va’erã ág̃a pene muñáva ha pende reraháva préso. Pejereraháta umi tupao ruvicha renondépe. Pe’áne ave mburuvicha guasu kuéra pópe, che disípulo haguére peẽ.

Upéva ojehúvo, ijáne ág̃a peẽme peñe’ẽ hag̃ua che rehe chupekuéra. Anínte pejepy’apy peje va’erãre. Che pomo’arandúne upévo, peikuaa hag̃ua mba’épa pejéta. Ha umi pende rehe ija’e’ỹva ndaikatu mo’ãi he’i peẽme mba’eve.

Pende rogagua voi pene ra’ã va’erã ág̃a pende kupe guio. Pende ru, pende ryvy téra pende ryke’ykuéra voi pene me’ẽ va’erã ág̃a mburuvichakuérape. Oĩ va’erã ág̃a pende apytépe ojejukáva. Ha che disípulo haguére peẽ, avave nda’ija’e mo’ãi pende rehe.

Anínte pejepy’apy. Peteĩ pene akãrague jepe ndo’ái chéne pende hegui. Pejerovia mbarete ramo che rehe, pejesalváta.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Mba’épa jajapóne ho’apáramo ñande tupaokuéra. Ho’áramo tupao Caacupé, Catedral, parroquia kuéra ha mba’e. Opánepa upéicha ñande jerovia. Mba’épa ere. Jesús ningo he’i upe tupao guasuete ha iporãitéva ojeitypaitétaha. Ha upéicha oiko raka’e.

Umi romano oike va’ekue Jerusalén pe, Jesús omano riréma, ohapy hikuái ha oity yvýre pe tupao. Sarambikue oheja.

Nemondýipa che reindy ha nde che irũ rehendu ha rehechávo ambue tetã rupi oĩha ohapýva tupao, santokuéra ha Ñandejára ra’anga jepe. Oime umi ojeroviáva Jesús re oñemuña, oñemosẽva, ha oĩ avei ojejukáva. Mba’épa jajapóne umíva oguahẽramo sapy’a ñande apytépe. Ani peñemondýi, he’i Jesús, ani pekyhyje. Ñandejára ndopoi mo’ãi ñande hegui mba’evéichavérõ. To’apa jepe ra’e ko múndo.

ÑAÑEMBO’E OÑONDIVE

Ñandejára Jesucristo, roma’ẽvo nde rehe, hetaite jehasa asy eropu’aka va’ekue jerovia pópe, roñembopy’a guasu roikuaágui nde reimeha opa ára ore ykére. Amén.

Pa’i Alberto Luna.