Ñahendu Jesús Ñe’ẽ. Jueves 29º Durante el Año

Escucha el evangelio y la reflexión en: https://youtu.be/cu_IhZSabgs

Jueves 29 Durante el Año Lucas 12, 49 – 53

Upérõ Hesu he’i idisípulokuérape: Tata amyendy haguã niko aju ko yvy ári. Ha nga’u ra’e hendýma katu hína. Che katu niko añemongarai vaerã ágã upe tatápe, ha upéva oguahẽ aja che angapyhy.

Peẽ piko peimo’ã aju hague arúvo py’aguapy ko yvy ári. Ndaupéichai hína. Aju arúvo joavy. Peteĩ ógape oikohápe 5, mbohapy opu’ãne mokõire. Túva ha ta’ýra opu’ãne ojuehe. Sy ha imemby opu’ãne ojuehe. Ména sy opu’ãne imemby rembirekóre, ha ha’e opu’ãne iména sýre.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Oiko jepi ñande rógape, terã ñamba’apo hape, térã katu ñande távape, lo mitã omone. Ojapo hendape’ỹva ha ivaíva. Ha ijetu’u ñambohovái haguã ha ñamyesakã. Lo mitã noñombojovakeséi, ndoikovaiséi hapicha ndive. Sapy’ánte katu jaikuaa porã mávapa pe mba’e vai apoha, opáichavo ñambohasánte.

Oñemolénte hũ lo mitã ha oheja rei, mba’evérõ guáicha. Sapy’ánte ko umía oiko jakyhyjégui ñambopochýramo guarã ambuépe ha jaiko vai ramo guarã oñondive. Ha upéicha heta mba’e ikatúva oñemohenda, opytánte upéicha vaikue guasu.

Avave nombohovaiséi. Ohejánte ohasa. Ha’ete peteĩ hasýva oñembotavýva imba’asýgui. Oikuaa porã ha ombohasáva ha noñepohãnói ha amo ipahápe ou hasyetéma ha nda’ipu’akavéiguintema otyryryhápe oho ha sapy’ánte naipohãvéima. Ha upéicha avei ñande cristiano jahecháva umi mba’e naiporãiva, ojapo vaíva ñande rapicha, ñande róga, ñande comunidad, ñande siuda ha ñane retã rehe, ikatúnte ñambohasa ha jaheja toiko la oikóa, amo ipahápe okapu peve. Ha ikatu avei ñahenonde’a ha ñambohovái jahapo’o ha jaipe’a haguã.

Upépe jepe jaikuaa va’erã péva ikatuha ogueru ñandéve joavy umi ñande rapicha ojapóva umi ivaíva ndive, ha sapy’ánte ndohechakuaáiva ivaiha. Pe pohã niko iro ha oñemoĩ ramo ñande pirére ñande jopi voínte. Opáichavo jaiporu mante, jaikuaágui ñaikotevẽha ani haguã oñembyaive ñande rete ha ñande rekove. Iporã niko la pohã ha tekotevẽ jaiporu, ndaigústoiramo jepe.

Jesús he’i ogueruha tata ñande apytépe. Tata ohapýva Aña rembiapo niko ndogusta mo’ãi voínte umi Aña rymba kuérape, oguata karẽva ha ndoipotáiva oñemyesakã hembiapo vai.

Umíva opóta ñande rehe hina ku ryguasu kurúicha japokóramo haitýre. Ani ñañemondýi che reindy ha nde che irũ. Ani jakyhyje umi joavy ha jeiko vaígui, opu’ãva ñane renondépe jaheka haguére iporãvéva Ñandejára ha ñande rapicha rayhupápe. Umíva ogue rire japytáne ñanembareteve ha hesakãvéne ñande rape.

Pa’i Jasy.