Ñahendu Jesús Ñe’ẽ. Martes 34° Durante el Año

Escucha el evangelio y la reflexión en: https://youtu.be/p9y_2wuJlAI

Martes 34º Durante el Año Lucas 21, 5 – 9

Upérõ Jesús ohendu mba’éichapa heta oĩ oguerohorýva pe tupao, ha opondera joáva opa umi mba’e oñeme’ẽ vaekuére tupao oñembojegua hag̃ua.

Upépe Jesús he’i: — Og̃uahẽ va’erã ára ko’ã mba’e oñehundipávo. Ko’ãvagui ndopytái chéne peteĩ itánte jepe ojo’ári.

Idisípulokuéra oporandu chupe: — Mbo’ehára, araka’ete piko ojehúta upéva.

Mba’éicha piko jaikuaáta og̃uahẽmaha upéva upe ára.

Jesús he’i chupekuéra: Cháke, aníke avave pene mbotavy. Heta vaerã ág̃a umi oúva che rérape. He’íne hikuái, “Chéko pe Mesías”, térã “Og̃uahẽma ára”. Ani mo’ãke peho umíva rapykuéri. Pehendúne oikoha guyryry térã ñorãirõ opa rupi rei. Ani peñemondýi. Umíva umi mba’e niko ojehu vaerã voínte ára paha og̃uahẽ mboyve.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Oĩ ningo umi tupao guasu, tuicháva, jahecháva fótope ambue tetãme. Catedralkuéra, santuario, basílica, tupao porã porã overapáva. Oime avei ñande tupao guasu Caacupé, hi’aguĩmava hÍna hi’ára. Tuicha, ijyvate, mombyrýgui jahecháva. Santuario nacional ñahenóiva.

Heta oñemba’apo va’ekue hese oñemopu’ã haguã. Heta ro’y ohasa opa mboyve. Oñemopu’ã mbeguekatu va’ekue opyta haguã oĩ háicha ko’ãga. Ha upépe jaháramo niko jahecha ramo pe tupao guasu. Umi okẽ tuicha tuicháva, ovetã yvate ha’angapáva, ha upe itécho apu’a yvate. Hi’árape katu ndaikatúi jaipapa umi ijatýva upépe. Heta hénte oguahẽva oñembo’e, promeséro kuéra ou ha ohóva, líñore ndosóiva oguatáva ára ha pyhare, ndaijapáiva tupaópe, omyataindýva okápe.

Opaichagua jahecha ijerére. Upéicha va’ekue avei Jesús retãme, amo Israélpe, upe tupao guasu Jerusalénpe. Hi’ára oguahẽvove henyhẽ, opaguio oúva oñembo’e, ogueru ofrenda tupaópe, hymba terã iñemitỹngue. Ou ha ohóva, ohecha ramóva oñembojegua porã lája pe tupao.

Jesús he’i chupekuéra ani haguã omboguapy ijerovia umi ita ári. Ndaha’éigui umi ita guasu térã jeguaka vera upe ombopyahútava hekove kuéra, térã omboguata porãtava upe tetãme. Jesús he’i opa umi mba’e ohasa va’erãha. Sapy’ánte ko ikatu ñande avei che reindy ha nde che irũ, jajepy’apy eterei ñamoporã jajaipa haguã ñande tupao ha ñande Capilla, ijapéguio. Ha upe aja katu ikatu ñande jerovia Jesús re ikangy.

Ñanesarambipa ojuehegui pe comunidápe, itapykue ñande apytépe ñembo’e, okañy ñande hegui mboriahu rayhu ha ñepytyvõ oikotevẽvape.

Pa’i Jasy.