Ñahendu Jesús Ñe’ẽ. Viernes 34° Durante el Año

Escucha el evangelio y la reflexión en: https://youtu.be/obHPpt26qxw

Viernes 34 Durante el Año Lucas 21, 29 – 33

Upérõ Jesús he’i idisípulokuérape mba’éichatapa upe ára ha’e ou jeytaha ha omombe’u chupekuéra ko káso. Pema’ẽna pe ígo mátare térã oimeraẽva yvyra mátare. Pehechárõ hokyha, peikuaa hína og̃uahẽmaha ára haku.

Péicha avei, pehecha vove ko’ã mba’e ojehuha. Upévo peikuaáta Ñandejára Rréino hi’aguĩmaha. Añetéko ha’e peẽme. Ko’ã mba’e ojehúta omanomba mboyve umi ko’ág̃a oikovéva. Yvága ha yvy ikatúne opa, ko’ã mba’e che ha’éva peẽme katu nahániri.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Ñama’ẽmi ñande parral mátare, terã katu ñane mango máta kuéra rehe. Heta yva ñande korapýpe oiméma hi’aju pota ko ára hakúpe. Ha umíva omombe’u ñandéve hi’aguĩmaha Niño ára, Navida. Ñama’ẽ avei mba’épa ojehu ñande jerekuévo. Mba’épa oĩ ñande ciudad ha ñane retãme ha mba’épa he’ise umi mba’e oikóva.

Peteĩ árape niko ou va’ekue umi Juan Bautista disípulo kuéra oporandu Jesús pe, ha’épa añete upe Ñandejára remimbou térãpa oha’arõ va’erã hikuái ambuépe.

Uperõ Jesús he’i vaekue chupe kuéra: “Tapeho peje Juan Bautista pe, ohechave’ỹva ohecha jeyha, ikarẽva oguata porã jeyha, ha mboriahúpe oñemombe’uha Ñandejára ohayhuha chupekuéra”.

Ko’ãga katu Jesús disípulo kuérama oporandu chupe: Mba’éichapa jaikuaáta oguahẽmaha Ñandejára Reino ñande apytépe, térã mombyry oimeha ñande hegui. Jahápa hína iláo jepe térãpa tuicha oime ñañedesatina ha okañy ñande hegui.

Ñama’ẽ vaerã niko, he’i Jesús, mba’épa ojehu ñande jerekuévo jaikuaa haguã ñane mombyrýpa Ñandejára Reino gui.
Ñama’ẽ vaerã niko oimépa ñapena mboriahukuéra rehe, mitã, hasýva, ñande aguélokuéra, ikangyvéva, ñande rapicha indígena, campesino, Bañadogua rehe.

Ñandejára Reino ou vove umíva oñemotenondéta hína. Ha umi ipy’a ratãgui hese kuéra nopenáiva ha oreko asývape katu, pe Ñandejára Reino oguahẽvo ho’a vaíta. Hendýta ha omoingéta ichupekuéra Aña retãme. Tuicha pecado hína jareko vai ñande rapicha mboriahu.

“Yvy ha yvága ohasapa va’erã, che ha’éva katu ndohasa mo’ãi araka’eve”. He’i ningo Kirito. Ha iporã avei ñapensami che reindy ha nde che irũ ha ñañemongeta oñondive.

Ko jaguata lája ñande rógape, ñande Iglesia pe, ha ñane retãme pa mba’épe tekotevẽ oñemyesakã ha oñemohenda porãve. Pe Ñandejára Reino ou vove ikatu haguãicha ñamopu’ã ñane akã Kirito renondépe.

Pa’i Jasy.