Ñahendu Jesús. Sábado 11º Durante el Año

Escucha el evangelio y la reflexión en: https://youtu.be/OTZ7viBXyww

Sábado 11º Durante el Año Mateo 6, 24 – 34

Péicha he’i Jesús idisípulo kuérape: Avave ndaikatúi ijára mokõivo. Nda’ija’éi chéne peteĩre ha ohayhúne pe ambuépe, térã ombojeroviáne peteĩme ha ojahéine pe ambuére. Ndaikatúi ñambojerovia Ñandejára ha pláta oñondive.

Che ha’e peẽme, ani peiko pejepy’apy mba’épa pe’úta térã mba’épa pemondéta. Ñande niko mba’e tuichave hína tembi’úgui térã aógui. Pema’ẽntena umi guyráre árare ovevéva. Umíva niko noñemitỹi, nomono’õi ha noñongatúi mba’eve. Upéicharõ jepe, ñande Ru yvágape oĩva omongaru chupe kuéra. Peẽ niko tuichaiteve mba’e chuguikuéra.

Peẽiko peimo’ã pejepy’apy haguére peiko pukuvetaha. Nahániri. Marãiko pejepy’apy pemonde vaerãre. Pema’ẽna umi yvoty ñumeguáre.

Umíva niko okakuaa omba’apo’ỹre ha ojapo’ỹre mba’eve. Ha che ha’e peẽme, Salomón jepe, opa ijeguaka reheve, na’iporãi va’ekue umi yvoty iporãháicha. Ha Ñandejára péicha omondérõ umi ka’avo ñúme ko’ágã opu’ãva ha ko’ẽrõ ojehapýva, niko ko’yteve pene monde porãta peẽme. Háa, hénte jerovia’ỹ. Pévare, ani pejepy’apy ha peje manté ‘Mba’éiko ja’úta.

Mba’éiko ñamondéta’ Umi Ñandejárare ojerovia’ỹva niko péicha oiko. Peẽ katu, pende Ru yvágape oĩva oikuaáma voi umi mba’e peikotevẽva. Upévare, peñeha’ã uvei pejapo umi mba’e Ñandejára oipotáva. Ágã upéi, hi’árape oñeme’ẽne peẽme opa peikotevẽva. Ani pejepy’apy ko’ẽrõguáre, peheja umíva ko’ẽrõrã. Ani pembojo’a pende ári jepy’apy rei. Ára ko’ẽre niko umíva ijeheguínte voi ou ñandéve.
Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ñane mitã ramo niko jaiko jajepy’apy’ỹre. Ku guyrami ha yvotýicha he’íva Jesús, Ñandejára omondéva, omongaru ha omongakuaáva. He’i háicha Rosicrán ñe’ẽ poty: “Ne mitã ramo va’ekue / nderory ha nderari / neresãi, repyvoi / háime háime reveve. / Ikyrỹi pe nde py’a / pukavýpemi reiko / marangatu rereko / nde resáre ojekuaa.”

Jesús ojerovia Ñandejárare ku mitãicha oñemosãva itúva póre, ha ojerovia ipy’aite guive Tupã oñangarekoha hese. Ome’ẽha chupe opa mba’e oikotevẽva, ha ndohejarei mo’ãiha chupe. Jesús ñanembo’e ñañeha’ã vaerãha jajapo Ñandejára rembipota, ha’éntema upéi ome’ẽta ñandéve opa mba’e ñaikotevẽva.

Reñandúpa che reindy ha nde che irũ Ñandejára oñangarekoha nde rehe. Oimépa rehecha ipo ome’ẽva ndéve upe reipota ha reikotevẽva, omoguahẽva ndéve eha’aro’ỹ ete hágui. Rehechápa mba’éicha ombojegua ndéve guarã yvoty, omopu’ã kuarahy,
oipeju piro’y nde rováre yvytu, ha omoguahẽ nde mesápe hi’upyrã.

Pa’i Alberto Luna.