Ñahendu Jesús. Sábado 2º Adviento

Escucha el evangelio y la reflexión en: https://youtu.be/52zQgh4_E-c

Sábado 2° de Adviento Mateo 17, 10 – 13

Upérõ idiśipulo kuéra oporandu Jesúspe: Mba’ére piko umi Moisés léi mbo’eha he’i Elías ou raẽ va’erãha?

Jesús he’i chupekuéra: Añete niko Elías raẽ ou va’erãha, ha ha’e omoĩ porãmba va’erã opaite mba’e hekópe. Ha che ha’e peẽme, Elías oúma hague ha avave ndoikuaái hague chupe. Upévare ojapo hikuái hese opa ojaposéva. Péicha avei che, kuimba’éicha ajuva’ekue, ahasa asýta ipópekuéra.

Upépe ae, hemimbo’ekuéra ohecha kuaa Jesús oñe’ẽ hague chupekuéra Juan Bautista rehe.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Umi profeta Israel gua niko he’i raka’e ou mboyve upe Mesías, Tupã remimbou, ou jey va’erãha Profeta Elías. Ha upévare ou oporandu Jesús pe iñirũ nguéra pe profeta Elías pa oúma ra’e, térãpa ndoúi gueteri. Ha Jesús he’i Elías oúma hague, ha Juan Bautista hague upéva, ou vaekue Elías rekovia, ojapo haguã tape Jesús pe.

Pe ñande rekove pukukue niko oime heta ñande rapicha ojapóva ñandéve tape jajotopa haguã Ñandejára ndive. Ñande karai guive voi oiméma oma’ẽva ñande rehe jareko haguã Tupã jehovasa, jaikéma haguã Ñandejára korápe. Oime ñande rogagua, ñande sy, ñande ru, ñande aguéla, ñane maína. Ñanembo’éva ñañepomoĩ ha ñatupãnói, jajovasakuaa haguã santo renondépe. Ñanembo’éva umi ñembo’e ypy: Padre nuestro, Ave María, Bendito. Ñande reraha tupaópe ñane mitã guive.

Upéi katu jaháma catecismo-pe, primera comunión, jaha confirmación-pe. Upéi oiméne ñanekonvidáva jaike haguã atýpe. Grupo de jóvenes, catequista oiko haguã ñande hegui. Opa umíva tuicha ñanepytyvõ ha ojapo tape ñande jakakuaa haguã ñande jeroviápe ha jaguata haguã Jesús ndive ñande Iglesia pe. Heta ñande rapicha cristiano oiko ñandéve guarã Juan Bautista ramo guáicha.

Ha nde avei che irũ ha nde che reindy. Ikatúko oguahẽma hína el tiempo cumplido,he’i háicha Emiliano, nde háma ko’aga ejapo tape umi nde rireguápe. Eipytyvõ ha emoirũ haguã nde rapichápe. Ehenói ha ekonvida, eiko heseve kuéra, ejapo tape Jesús pe ou haguã oguahẽ nde rapicha rekovépe.

Pa’i Jasy.