Ñahendu Jesús. Sábado 3º Tiempo Durante el Año

Escucha el evangelio y la reflexión en: https://youtu.be/meSvFc5CoCc

Sábado 3º Tiempo Durante el Año Marcos 4, 35 – 41

Ka’arúma ramo upe árape, Jesús he’i idisípulo kuérape: Jahasa mar mboypýri. Ha omondo rire opavavépe, hemimbo’ekuéra ogueraha Jesúspe upe kanóa oĩháme.

Oĩ ave ambue kanóakuéra omoirũva chupekuéra. Ha peichaháguinte oñepyrũ oipeju yvytu ne ratãva, ha pe y pochy opu’ã pe kanóa ári ha omyenyhẽ ýgui. Jesús katu oke hína upe kanóa ruguápe, peteĩ akãngyta ári. Omombáy ha he’i chupe hikuái: Mbo’ehára, nderehecha kuaái piko ñañapymítamaha.

Jesús opu’ã, oja’o pe yvytúpe ha he’i pe márpe: Ekirirĩ! Epyta upépe!

Ha opi pe yvytu ha oguapy pe y. Upéi Jesús he’i hemimbokuérape: Mba’ére piko peñemondýi. Ne’ĩra gueteri piko pejerovia.
Idisípulo kuéra katu okyhyjeeterei ha oporandu joa ojupe: Máva piko kóva, yvytu ha mar jepe iñe’ẽ rendúva ichupe.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ka’aru oguahẽvo tembiapo opa. Ñane kane’õ japyta ha ñaguahẽséntema ñande rógape ñañembopiro’y ha japytu’umi. Nañande retia’evéima ñaína ñamba’apove térã ñañeha’ã haguã mba’eve guasúre. Oguapýma ñande rehe pe kuarahy, ty’ái ñande apére
ñane mbopireju’i.

Jahecha Jesús ha ijapóstolkuéra ka’arúma ramo ohasa rire peteĩ ára puku hetaeterei ijatýva ijerekuévo apytépe. Oñemoñe’ẽ ha oñembo’e rire hesekuéra ára pukuku jave, oheja chupekuéra ha ohasa pe lágo oho haguã opytu’umi idisípulo kuérandive.

Jesús oke atã voi ikane’õgui ha opu’ã peteĩ ama nde vaíva, háime omoñapymíva pe kanóa ohohápe. Vaípeko ojecha umi apóstol.
Ñañandúramo Jesús oimeha ñanendive niko ñane kyre’ỹ. Ha’ete voi jaropu’akapátava oúva guive. Ágã katu okañy imíramo ñande hegui, ku oke haguéicha ijapóstolkuéragui, japytáma ñanekangy. Upévo ha’eteku Ñandejára nopenavéiva ñande rehe.

Upéicha jave che irũ ha che reindy, oiméne eñandúma avei nde rekovépe, ou pe Aña, ama pochy hũmbávaicha opu’ã ha ñanembokuchu ñanemoñapymi haguãicha.

Upéicha jajecháramo tekotevẽ avei ñande jaha jajerure socorro Ñandejárape. Ou haguã ojoko ha omokirirĩ umi yvytu ñanemovã ha ñandereityséva. Tajapyta jey iñe’ẽ rupi py’aguapýpe.

Pa’i Alberto Luna.