Ñahendu Jesús. Sábado después de Ceniza

Escucha el evangelio y la reflexión en: https://youtu.be/HWwhcR0gj10

Sábado Tanimbu ára rire Lucas 5, 27 – 32

Jesús osẽ oho, ha hesaho sapy’a peteĩ impuésto okovrávare. Matéo héra, ha oguapy hína omono’õ pláta pe tape ári. Jesús he’i chupe: — Eju jaha. Ha Matéo ohejapa oguerekóva, ha oho Jesús ndive.

Hógapema, Matéo ojapo peteĩ karu guasu Jesús rérape. Upépe ijaty hapichakuéranimpuésto okovráva, ha Matéo kuaaha. Fariséo kuéra ha umi Moisés léy ombo’éva katu oñepyrũ oñe’ẽ api hikuái Jesús disípulo kuérape. He’i hikuái: — Mba’ére piko peẽ pekaru umi impuésto okovráva ñandéve ndive, ha tapicha reko vai atýrandi.

Jesús katu he’i chupe kuéra: — Hesãiva niko noikotevẽi médico, hasývante. Che niko ndajúi ahenóivo umi heko jojávape. Che aju ahekávo iñangaipávape ojere haguã Ñandejára gotyo.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Jaháramo ñañe’ẽ Ñandejárare umi oúva voínte tupaópe ndive, jaháramo ñañembo’e umi oñembo’éva voínte ára ko’ẽre ndive, ivevuivéta ñane rembiapo; umíva oguerohorýta Ñandejára ñe’ẽ ha ñanemoguahẽ porãta.

Upépe ñande piro’ýta. Ága katu jaikéramo umi ndoikuaáiva voi mba’eve Ñandejáragui, umi hesaitéva tupaógui apytépe, jaháramo jaheka umi ñembo’e jepe ndoikuaáiva, isagua’a ha iraríva Ñandejáragui; umíva ndive ijetu’uve jaguata. Opáichavo umíva oikotevẽve.

Sapy’ánteko japytasénte ñande kora’ípe. Upe jajokuaa hápe. Ñande grupo jaguatáva voi comunidápe, ñande rógapente. Upépente jajere ojuehe ha nañasẽséi jaheka umi okañýva ñúre, umi oikóva javorái kuápe. Umíva hína oikotevẽve umi oguata porãmavagui voi.

Jesús niko oike umi hekove vaíva pa’ũme jahechápa noguenohẽi chupekuéra pe karugua opa’ã hágui. Ha ojehe’ávo umi tujúre oikóva, hekove ky’áva ndive, ohypýi avei chupe pe tuju. Ha upéva ohecha umi fariseokuéra.

Umíva niko oimo’ã ojapopa haguére Ñandejára léi, oñembo’e puku haguére, ikatúma ojeguaru hapicha heko ky’ávagui ha noñemonái voi umi heko vaíva rehe. Jesús katu oguejy pe yvate oĩ hágui, ojehe’a umi ho’a va’ekue ndive ha ojykeko hese kuéra omopu’ã haguã.
Mba’épa nde reñandu che irũ ha nde che reindy upe Jesús ñanembo’éva.

Ikatúnepa ñande ave ñañemboja ñaipytyvõ umi jaikuaávape hína oiméha javorái ha tujukuápe ha oikotevẽva ñañeha’ã hesekuéra, Jesús ojapo haguéicha. Mba’épa ere ichupe.

Pa’i Alberto Luna.