Ñahendu Jesús. San Antonio de Padua ára

Escucha el evangelio y la reflexión en: https://youtu.be/BxvIpryyXvA

San Antonio de Padua ára. Lucas 10, 1-9.

Upérõ Jesús oiporavove 72 idisipulorã ha umívape omondo henonderã, mokõi-mokõi, puebloha rupi hamba’e, umi ha’e ohasataha rupi. He’i chupekuéra: Ajépa tuicha pe Ñandejára kokue ha heta hi’a, omono’õ vaerãnte mbovy.

Upévare, pejerure Ñandejárape tombohetave umi ou va’erãva omyerakuã pe marandu porã opavavépe. Tapeho peẽ. Peikuaáke pomondoha hína ku ovecháicha jaguaretekuápe. Ani peraha pláta térã pende avíorã térã pende py rehegua ave. Ani avavépe pemomaitei tapére.

Oimérõ pene mog̃uahẽva hógape, pya’ete pemomaitei pejévo “Ñandejára rérape ta peime porãmba, ha py’a guapy toĩ pene ndive.” Ha oiko ramo hikuái py’a guapýpe, pene ñembo’e ohovasáne chupekuéra. Nahánirirõ katu, peẽme jeýnte opytáne. Ani peiko peva-peva rei óga-ógagui. Pepyta upe peg̃uahẽháme ha pe’u upe oñeme’ẽva peẽme. Omba’apóvape niko ija ohupyty hembiapo repykue.

Peike ramo peteĩ puéblope ha pene mog̃uahẽ porã ramo hikuái, pe’u umi mba’e oñeme’ẽva peẽme. Pemonguera opa hasýva ha peje chupekuéra Ñandejára Rréino hi’aguĩmaha.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ko árape ñane mandu’a San Antonio de Padua rehe. Oime ningo omoĩva ha’anga oakãvo, ha péicha orekóva ichupe ohupyty peve oipotáva. Fernando va’ekue la héra ypy. Onase va’ekue Portugal pe año 1195 pe. Ha’e San Francisco de Asís javegua va’ekue ha oikuaa mboyve franciscanokuérape oikóma va’ekue Ñandejára rapére Agustinianokuéra ndive.

Upéinte ko ou oikuaa ojejuka hague mbohapy franciscano tetã Marruecos pe. Péva opoko iterei hese ha oike franciscanokuéra ndive oho haguã hendaguépe. Ha upépe oguerova héra ha ou oñehenói Antonio.

Upe rire Antonio oho Asis pe. San Francisco oiko hápe, ojotopa hendive ha opyta tetã Italia pe. Ha iñarandu je raka’e Antonio, ha oñe’ẽkuaa voi. Ika’avo ha ombyaty hetápe ha oñemoñe’ẽ ichupekuéra Ñandejára ñe’ẽre ha Jesús rapére. Ndaijapái tupaópe ha upémaro osẽ okaháre ombyaty umi gente kuéra oúva ohendu ichupe.

Antonio ndohecha porãi va’ekue umi itaryrýiva plata re ha imba’epota rasáva, ombyatýva ijupe guarãnte ha avei okopi umi usurero rehe ha oja’o ichupekuéra.

Ohayhúgui etereígui Jesús pe jahecha jepi Antonio ra’anga, orekóva ijyva ári Jesús pe imitãramo guare. Ha avei jahecha jepi ipópe pan ome’ẽva oikotevẽvape. Aipóramo San Antonio ñanembo’e ñande pojera ha ñame’ẽ haguã ñande rapicha oikotevẽvape.

Ñanemandu’arõ hese ndaha’éi jajerure haguãnte, ñame’ẽkuaa haguã avei ñande jehegui Jesús ñanembo’e haguéicha.

Pa’i Alberto Luna.