Ñahendu Jesús. Viérne de dolóre: Tupãsy kurusu ykére

Escucha el evangelio y la reflexión en: https://youtu.be/GruAG6XYlAI

Viérne de dolóre: Tupãsy kurusu ykére. Juan 19, 25 – 27

Jesús kurusu ypýpe oĩ hína isy María, ha itia María ku Cleofás rembireko, ha María Magdaléna ave. Jesús ohechávo isýpe ha ijykére oĩha hína pe idisípulo ha’e ohayhúva.

He’i isýpe: — Péina upépe ne memby.

Upéi he’i idisípulope: — Péina upépe nde sy.

Upe guive, pe Jesús disípulo ogueraha Maríape hendive hógape.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Heta sy ohasa oke’ỹre imemby hasýva rupa akãme. Oime avei hospitál-pe oguapýva ihénte kuéra rupa ykére, oñenóva yvýpe, pasillo rupi opytu’u. Oiko oheka pohã, oñe’ẽ doctor, enfermerakuéra ndive, oñeha’ã ombovevúi mba’asy hapichápe. Oĩ umi ohóva ohecha préso kuéra cárcel-pe, oñandu ha omoirũ, oraha provistami.

Oime avei ohóva oñemoñe’ẽ umi ipy’a tarováva térã ojepy’apy etereívape, oñeha’ã ohesape ha omokyre’ỹ. Oime avei oñembo’éva hapicháre ha hendive voi ojeruréva Ñandejára ñepytyvõ osẽ haguã karuguágui, ohupyty haguã py’aguapy.

Jahecha Tupãsy María, mokõi iñirũ ndive, las 3 María, oñembo’ýva kurusu puku ykére, apóstol Juan ndive. Omoirũ Jesús jehasa asy, ikatu’ỹramo jepe omboguejy, oipohano, ombopiro’ymínte jepe. Oime upépe ijykére oñandu chupe ha ohasa hendive ipohyikuete. Péva tuichaiterei mba’e. Pe ñaime ñande rapicha ohasa asýva ykére ha ñamoirũ chupe ndaikatúiramo jepe ñarremedia. Ha péva ohechávo Jesús, tuicha oguapy hese ha omoheñói ipy’aiteguive mborayhu isy María ha iñirũnguérape guarã.

Jesús he’i isýpe umi iñirũnguéra opytaha hekovia, imembyrã. Ha upépe, apóstol Juan akãre, ñandejapa ñande jajeroviáva Jesús-re. Oñeme’ẽ ñandéve María ñande syrã.

Pe oje’éva Juánpe oje’e avei ñandéve: “Péina upépe nde sy.” Ha Juan upeguive oraha haguéicha Tupãsýme hógape, ñamoguahẽ ñande avei chupe ñande rógape, ha jareko chupe ñande sýramo.

Upéicha jahasa asy ha jajejopy jave, ñande kurusu ipohýi vove, jaikuaa nañaneñoiha. Oĩha ñande ykére ñande sy. Ha pe tuichave mba’éva, Jesús ñanemoirũ jehasa asýpe. Ohupi ñanendive ha ñanepytyvõ ñamboguata haguã ñande kurusu, jerovia ha py’aguapy reheve.

Pa’i Alberto Luna.